Британия мудофаа вазири Грант Шаппснинг айтишича, НАТОга аъзо бўлмаган, аммо унинг мудофаа қобилиятидан фойдаланаётган нейтрал давлатлар ҳарбий иттифоққа қўшилиши керак. Бу ҳақда у Лондондаги чиқиши чоғида айтиб ўтди, деб ёзади Politico.
Шаппс НАТО аъзоси бўлмаган ва бетарафлик позициясига эга Ирландия, Малта, Австрия ва Швейцария каби Европа давлатларига тўғридан тўғри ишора қилмаган. Бироқ у Буюк Британия кўпроқ мамлакатларнинг НАТОга қўшилиши учун ташаббус кўрсатишини айтди.
“НАТО ҳимоясидан баҳраманд бўлганларнинг барчасини иттифоққа қўшилишга чақираман, баъзи Европа давлатлари НАТО ҳимоясидан самарали фойдаланади, лекин қитъани жамоавий равишда ҳимоя қилишга қўшилмайди”, — деди Британия мудофаа вазири.
“Бўри Европа хавфсизлиги эшигининг ортида турганида бетарафликка ўрин қолмаслиги керак”, — дея қўшимча қилди Шаппс.
Politico’нинг қайд этишича, Россиянинг Украинадаги кенг кўламли уруши айрим нейтрал Европа давлатларида узоқ йиллик сиёсатни қайта кўриб чиқиш ва НАТОга аъзо бўлиш ҳақида мунозараларга сабаб бўлган.
Финляндия ва Швеция шундай мунозаралардан сўнг иттифоққа қўшилган.
Шаппс НАТОнинг амалдаги аъзоларини мудофаа харажатларини ЯИМнинг 2,5 фоизигача оширишга чақирар экан, альянснинг ҳозирги мақсади ялпи ички маҳсулотнинг камида 2 фоизини мудофаа учун сарфлаш эканини айтиб ўтди.
Изоҳ (0)