Футбол бўйича Европа Лигасининг финалида “Аталанта” ва “Байер” 22 май, чоршанба куни ўзаро тўқнаш келади. Дублинда бўлиб ўтадиган учрашувга оид маълумотлар ва қизиқарли фактлар тақдим этилади.
Ирлания. Дублин. “Дублин Арена”
22 май, чоршанба
“Аталанта” –“Байер” 00:00
Бош ҳакам: Иштван Ковач (Руминия)
“Аталанта”
Бергамоликлар ўз тарихидаги илк Еврокубок финалига яхши формада етиб келди. Жан Пьеро Гасперини шогирдлари uikendда “Лечче”ни 2:0 ҳисобида таслим этди ва А Серияда ўзига 5-ўринни кафолатлади. Агарда жамоа Дублиндаги финалда ғалаба қозонса, кейинги мавсум учун Чемпионлар Лигаси йўлланмасини ҳам қўлга киритиши мумкин.
Бироқ клуб ва унинг мухлисларини Италия Кубогида “Ювентус”га бой берилган имконият (0:1) хафа қилди. Туринликлар устози Массимилиано Аллегри эса соврин ютган ҳолда истеъфога чиқиб кетди.
“Аталанта” бош мураббийи ҳам Европа Лигаси финалидан сўнг жамоани тарк этиши мумкин. Италия нашрлари сўнгги пайтлар Гасперинини “Наполи” билан “боғламоқда”.
Финалга бергамоликлар бир неча муаммолар билан ташриф буюради. Катта эҳтимол билан жамоага де Рон, Колашинац ва Ҳолмлар ёрдам бера олмайди.
“Аталанта”нинг Дубльиндаги финалга қадар босиб ўтган йўли ҳақида видеони томоша қилинг:
“Байер”
Немис клуби мавсумнинг энг кутилмаган воқеасини — мағлубиятсиз серияни давом эттирмоқда. “Байер” Бундеслиганинг сўнгги турида “Аугсбург”ни 2:1 ҳисобида таслим этди ва чемпионатни бирорта мағлубиятсиз якунлади.
Хаби Алонсо шогирдлари бошқа турнирларда ҳам омадсизлик нималигини билмай келмоқда. Жамоани олдинда 2 та финал кутиб турибди — дастлаб, Европа Лигаси, кейин эса Германия Кубоги финали.
“Байер” финалга ҳеч қандай йўқотишларсиз ташриф буюрмоқда. Ёш иқтидор Флориан Вирцнинг соғлигида муаммолар бор эди, аммо шифокорлар унга майдонга тушишга рухсат берган. “Аугсбург”га қарши ўйинда Алонсо бир неча муҳим футболчиларига дам берди.
Бу эса “Байер”нинг иштироки ҳақидаги видеолавҳа:
Ўйин олдидан қизиқарли фактлар:
- “Байер” мавсум давомида 51 та ўйиндан буён (42 та ғалаба ва 9 та дуранг) мағлубият нималигини билмаяпти;
- Леверкузенликлар Европа Лигасида кетма-кет 13 ўйиндан буён (9 та ғалаба ва 4 та дуранг) мағлуб бўлмаяпти;
- “Аталанта” Европа Лигаси доирасида сафардаги ўйинларда 9 ўйинлик мағлубиятсиз серия намойиш этмоқда.
“Аталанта” — “Байер” ўзаро ўйинлар тарихига назар:
Бунга қадар жамоалар Еврокубокларда бир марта тўқнаш келган. 2021/22 йилги Европа Лигаси 1/16 финалида ўзаро баҳс олиб борган ва унда “Аталанта” иккала ўйинда ҳам ғалаба қозонган (ўз уйида 3:2, Леверкузенда 1:0). Бергамоликлар сафида гол урган футболчилар ҳозир клубда тўп сурмайди — Малиновский, Муриэль ва Бога. “Байер”даги голларни урган Диаби ва Арангислар ҳам ҳозир клуб шарафини ҳимоя қилмайди.
Мураббийларнинг ўйин олди фикрлари
Кетма-кет 3 ой давомида ҳар уч кунда ўйин ўтказиш жуда қийин. Жуда кўп яхши ўйинлар ўтказдик. “Ювентус”га қарши Италия Кубоги финали биз учун омадсиз кечди. Бироқ олдимизда яна бир финал турибди.
Буюк жамоага қарши ўйнаймиз. Рақамлар ва бу мавсумдаги кўрсаткичлар барчасини айтиб турибди. Лекин биз Италияда ва халқаро ўйинларда кучли жамоаларга қарши доим ўйнаб келганмиз. Ўзимизга бўлган ишонч юқори.
Жан Пьеро Гасперини, “Аталанта” бош мураббийи
Ўйинга тайёргарлик кўрдик ва ҳеч нарсани ўзгартирмадик. 51 ўйинлик мағлубиятсиз серия ҳақида кўп гапирилди, бу яхши, албатта. Энди эса олдимизда турган 2 та ўйинни ҳам ютишимиз лозим.
Ўтган мавсум ярим финалдаги мағлубият бизга катта мотивация берди. Финалга яқин келгандик. Финал баҳсига эса ғалаба учун тушилади. Сўнгги қадамли ташлашга тайёрмиз.
Жуда ёш мутахассис эдим, “Байер” менга иш таклиф қилганида бундан нимадир чиқишига ҳам ишонмаганман. Атиги бир ярим йил ўтган бўлса-да, биз жуда кўп тўғри қарорларни қабул қилдик. Бу вақт давомида фантастик характер намойиш эта олдик.
Сўнгги дақиқаларда ҳам гол ура олишимизни биламиз. Бу мавсумда жамоа жуда катта ўсишга эришди.
Хаби Алонсо, “Байер” бош мураббийи
“Аталанта” ва “Байер” ўртасидаги учрашув Ўзбекистон вақти билан 22 майдан 23 майга ўтар кечаси 00:00 да старт олади.
Изоҳ (0)