НАТО бош котиби Йенс Столтенберг Украинани қайта тиклаш масаласини ҳал қилиш учун аввало унинг урушдаги ғалабасини таъминлаши кераклигини айтди. Унинг сўзларига кўра, агар Украина мағлуб бўлса, қайта тикланадиган ҳеч нарса қолмайди.
“Урушдан кейин Украинанинг тикланишига келсак, биз биринчи навбатда унинг ғалаба қозонишини таъминлашимиз керак. Агар Украина ғалаба қозонмаса, унда эркин ва мустақил Украинада қайта тикланадиган ҳеч нарса бўлмайди”, — деди бош котиб НАТО ёшлар саммитида. У мамлакатни қайта тиклаш масаласи келажакда жуда муҳим бўлишини, аммо ҳозирда асосий устуворлик урушда ғалаба қозониш эканини таъкидлади.
Столтенбергнинг қўшимча қилишича, айнан шу сабабдан иттифоқ мамлакатлари Украинага кўрсатаётган ёрдамини кучайтириш зарур. Унинг сўзларига кўра, НАТО ҳам Украинага мудофаа ва хавфсизлик институтларини тиклашга ҳамда мамлакатга ҳар томонлама ёрдам беришга тайёр.
Жаҳон банки, БМТ, Европа комиссияси ва Украина ҳукуматининг февраль ойидаги прогнозларига кўра, Украинани тиклаш учун ўн йилга 486 миллиард доллар керак бўлади. Маблағнинг 17 фоизи уй-жой қурилишига, 15 фоизи транспортга, 14 фоизи савдо ва саноатга, 12 фоизи қишлоқ хўжалигига, 10 фоизи энергетикага йўналтирилиши керак. Барча тармоқлардаги чиқиндиларни тозалаш учун 11 миллиард доллар талаб қилинади.
Изоҳ (0)