Арктиканинг тоғли минтақасида Манҳэттен катталигидаги ва “геосиёсий аҳамиятга эга” ер участкаси 300 миллион еврога сотилмоқда, дея Bloomberg хабар берди.
Маълум бўлишича, ҳудуд об-ҳаво ўзгариши сабабли сотилмоқда: Арктикада 2023 йилда энг иссиқ ёз қайд этилган, Свальбард ҳудудида денгиз музлари камайиши, ёмғир ва юқори ҳарорат кузатилган.
Бу Арктикада ҳудуд сотиб олиш ва стратегик ўринга эга бўлиш учун ягона имкониятдир, — деди сотувчилар вакили бўлган адвокат Пер Киллингстад.
Унинг таъкидлашича, бу Норвегия архипелагидаги сўнгги хусусий участка.
Шпицберген архипелаги Норвегияга тегишли. Унинг майдони 61 квадрат километрни ташкил қилади, тахминан 60 фоиз қисми муз билан қопланган. 2020 йил ҳолатига кўра, аҳолиси деярли 3 минг кишини ташкил этган. Архипелагда глобал фалокат юз берган тақдирда Жаҳон уруғлик омбори ва Жаҳон Арктика архиви, бутун дунё олимлари учун бир нечта илмий қутб станциялари мавжуд.
Шпицбергеннинг жануби-ғарбий қисмида Сёре Фагерфорд номи билан машҳур бўлган 6 минг гектарлик шахсий участка “Knight Frank LLP” томонидан сотилмоқда. У Лонгйир шаҳри яқинида жойлашган ва 5 км қирғоқ чизиғини ўз ичига олади.
Сотувчилар вакилининг сўзларига кўра, улар сўзсиз харидор қидирган, Норвегия ҳукумати билан музокаралар олиб борилган, бироқ келишувга эришилмаган.
Участка энг юқори нарх таклиф қилганга сотилади, — деди ҳуқуқшунос Пер Киллингстад.
Компаниянинг фикрича, бу ер участкаси атроф-муҳитни муҳофаза қилиш ва асрашга катта таъсир кўрсатмоқчи бўлганлар учун сармоявий лойиҳа бўлиши мумкин.
Бироқ, Свальбардда ердан фойдаланиш бўйича қатъий чекловлар мавжуд. Харидорлар Норвегия суверенитетини тан олиши ва архипелагдан ҳарбий мақсадларда фойдаланишни тақиқловчи 1920 йилдаги Шпицберген шартномасига риоя қилишлари керак. Шартнома Биринчи жаҳон урушини тугатган Версал музокараларидан кейин имзоланган. Уни 40 дан ортиқ давлат, жумладан Хитой, Россия, Буюк Британия ва АҚШ ҳам имзолаган.
Изоҳ (0)