АҚШ расмийлари ўтган ҳафта Ғазо секторининг Рафаҳ шаҳридаги ҳарбий амалиётлар чоғида қўлланиши мумкинлигидан хавотирланиб, Исроилга 3500 та ҳаво бомбаси етказиб беришни тўхтатди. Бу ҳақда тегишли манбаларга таяниб, CNN хабар берди.
Хабарга кўра, оғирлиги 2 минг фунт (907 кг) бўлган 1,8 минг дона бомба, шунингдек, 500 фунт (тахминан 227 кг) бўлган 1,7 минг бомба етказиб берилиши тўхтатилган.
Биз, айниқса, Ғазонинг бошқа қисмларида кўрганимиздек, 2000 фунтлик бомбалардан фойдаланиш масаласига ва уларнинг аҳоли зич жойлашган шаҳарларга таъсирига эътибор қаратмоқдамиз, — дейди исмини ошкор этмаган расмий CNN телеканалига.
Тhе New York Times’га кўра, АҚШ президенти Жо Байден Исроил Ғазода ҳужум бошлаганидан бери биринчи марта қурол-яроғ етказиб беришни тўхтатиб туришдан сиёсатга босим сифатида фойдаланган. АҚШ маъмурияти келажакда оддий бомбаларни аниқ қуролга айлантира оладиган тўпламларни етказиб беришни тўхтатиш масаласини кўриб чиқмоқда.
Аввалроқ Axios портали икки исроиллик расмийга таяниб, Америка маъмурияти 2023 йил 7 октябрдан бери илк бор Исроилга ўқ-дорилар етказиб беришни тўхтатганини хабар қилган эди. Бу ҳаракат Исроил расмийларида жиддий ташвиш туғдирган. 6 май куни Оқ уй Миллий хавфсизлик кенгашининг стратегик алоқалар бўйича координатори Жон Кирби АҚШнинг Исроилга ракета етказиб беришни тўхтатгани ҳақидаги маълумотни тасдиқлашдан бош тортган.
Изоҳ (0)