Украина армияси сафида жанг қилишни режалаштирган Россия фуқароси 10 йилга озодликдан маҳрум қилинди. Бу ҳақда The Moscow Times нашри хабар берди.
Россия суди 25 апрель куни давлатга хиёнат ва терроризмда айбланган сибирлик фуқарони Украина учун жанг қилаётган Россия бўлинмаларига қўшилиш режаларида айбланиб, узоқ муддат қамоқ жазосига ҳукм қилган. Айблов эълон қилиш учун тегишли барча далиллар кўрсатилган.
Манбада айтилишича, 26 ёшли фуқаро ҳуқуқ-тартибот идоралари томонидан Кемерово вилояти ҳудудидан Украинага жўнаб кетаётган вақтида қўлга олинган.
“ТАСС” агентлигининг хабар беришича, Киев учун курашаётган, Кремлга қарши бўлган рус бўлинмалари “Россия эркинлиги легиони” ташкилотини таъсис этишган. Ушбу ташкилот ижтимоий тармоқларда ўз рамзларини эълон қилиб, Украина томонида туриб жанг қилишни истаган барча русларни ўз сафига чақирган.
Москва ушбу ташкилотни террорчи сифатида тақиқлаган. Ташкилот билан ҳар қандай алоқа учун жиноий жавобгарлик белгиланган.
Россия томонидан босиб олинган Украина жанубидаги Запорожье вилоятида Москва томонидан ўрнатилган ҳукумат 25 апрель куни маҳаллий фуқарони Украина фойдасига жосуслик қилгани учун 11 йилга озодликдан маҳрум этган эди. “ТАСС” хабарига кўра, у Россия қўшинларининг ҳаракати ва йўналишлари тўғрисида маълумот тўплаган ва Украина томонига узатган.
Изоҳ (0)