Нигерияда 25 апрель куни 100 нафардан ортиқ хавфли маҳбуслар кучайтирилган тартибдаги қамоқхонадан қочиб кетишга эришди. Бу ҳақда BBC нашри хабар берди.
Манбада айтилишича, ҳодиса Сулежа қамоқхонасида рўй берган. Ҳудудда кучли ёмғир ёғиб, сел келиши оқибатида қамоқхона биноси жиддий шикастланган. Натижада эса ундаги маҳбусларнинг 118 нафари қочиб кетган.
Расмийларга кўра, ҳозирга қадар озодликда юрган маҳбусларнинг 10 нафари қамоқхонага қайтарилган. Қолганларга нисбатан эса қидирув эълон қилинган.
“Хавфсизлик агентликлари билан биргаликда биз ҳозиргача қочган 10 та маҳбусни қўлга олдик ва уларни қайтариб олиб келдик, қолганларини эса қўлга олиш учун қизғин таъқиб қиляпмиз”, — дейилади Абужадаги қамоқхона маъмурияти баёнотида.
Сулежа қамоқхонаси Нигерия пойтахти Абужадан 50 км масофада жойлашган. У мустамлакачилик даврида қурилган бўлиб, эскирган ва заиф бино ва иншоотлардан таркиб топган.
Икки йил олдин ҳам Абужа атрофидаги бошқа қамоқхонадан 400 дан ортиқ маҳбус қочиб кетгани хабар қилинган эди. Бунга террорчи гуруҳнинг қамоқхона биносига уюштирган ҳужуми имкон яратиб берган. Ўшанда юз берган отишмалар оқибатида 4 нафар маҳкум, бир нафар қамоқхона қўриқчиси ва бир нечта террорчи ҳалок бўлгани айтилган.
Маълумотларга кўра, 2020 йилдан бери Нигерияда жами 5000 нафардан ортиқ маҳбус қамоқхоналардан қочишга эришган.
Изоҳ (0)