“Ғишткўприк” чегара божхона постида кузатилаётган тирбандликлар юзасидан маълумот берилди

Тошкент вилояти божхона бошқармаси ижтимоий тармоқларда “Ғишткўприк” чегара божхона постида кузатилаётган тирбандликлар юзасидан маълумот берди.

Қайд этилишича, айни кунларда Тошкент вилояти божхона бошқармасининг “Навоий” чегара божхона постида замонавий божхона пости қад ростлаётгани сабабли мазкур постнинг фаолияти вақтинча тўхтатилган. Шу сабабли асосий оқим “Ғишткўприк” чегара божхона постига тўғри келмоқда.

“Ғишткўприк” чегара божхона пости орқали бир кунда 30 мингдан 35 минг нафаргача фуқаро ва 1000 дан ошиқ транспорт воситаси ҳаракатланмоқда.

Фуқаролар ва транспорт оқимининг йилдан йилга кўпайиб бораётганини инобатга олган ҳолда мазкур постни кенгайтириш мақсадида реконструкция ишлари амалга оширилмоқда. “Чегара божхона пости бутунлай замонавий қиёфа касб этади. Реконструкция ишлари жорий йилнинг октябрь ойида тугатилиши режалаштирилган”, — дейилади хабарда.

2023 йил октябрь ойида божхона бошқармаси “Ғишткўприк” пости келгуси йилнинг март ойида фойдаланишга топширилишини маълум қилганди.

Олдинроқ “Ғишткўприк” постидаги божхоначилар йўловчиларнинг товарларини киритмаётгани айтилган хабарларга муносабат билдирилган эди. Таъкидланишича, Ўзбекистон давлат чегараларининг автойўл (пиёда) божхона чегаралари ўтиш пунктлари орқали олиб ўтишда — 300 доллар эквиваленти миқдоридаги товарларни божсиз олиб киришингиз мумкин.