Исроил Мадримов матбуот анжуманида иштирок этиш учун АҚШга жўнаб кетди

Ўзбекистонлик боксчи Исроил Мадримов матбуот анжуманида иштирок этиш учун АҚШга жўнаб кетди.

Бутунжаҳон бокс ташкилоти (WBO) Мадримов — Кроуфорд жанги ғолиби WBO йўналишининг вақтинчалик камарини қўлга киритишини маълум қилди.

Ушбу жангда ғалаба қозонган боксчи биринчи ўрта вазн тоифасида вақтинчалик (Interim) WBO камари соҳибига айланади. 

Маълумот учун ушбу вазн тоифасида WBO йўналиши чемпиони Себастьян Фундора ҳисобланади. 

Мадримов матбуот анжуманида иштирок этиш учун АҚШга йўл олди. Айнан шу анжуманда Мадримов — Кроуфорд жанги расман эълон қилинади. WBO камари учун кечадиган жанг 3 август куни Лос-Анжелес шаҳрида ўтказилиши кутилмоқда. 

Қайд этиб ўтиш жоиз, ўтган йилнинг 30 июль куни Кроуфорд ҳамюрти Эррол Спенсни тўққизинчи раундда техник нокаутга учратиб, ярим ўрта вазн тоифасида мутлақ жаҳон чемпионига айланган эди.

Америкалик чемпион профессионал рингда ўтказган 40 та жангининг барчасида ғалаба қозонган. Ғалабаларининг 31 тасига нокаут орқали эришган.

Эслатиб ўтамиз, Исроил Мадримов 8 март оқшомида Саудия Арабистонининг Ар-Риёд шаҳрида россиялик Магомед Курбановни 5-раундда нокаутга учратиб, WBA камарини қўлга киритганди.