Зинедин Зидан мураббийликка қайтади. Унинг кейинги клуби “Бавария” бўлиши мумкин

Зинедин Зидан “Бавария” бош мураббийига айланиши мумкин.

Mundo Deportivo нашрининг хабарига кўра, Юлиан Нагелсманн Германия терма жамоаси билан шартномани узайтирганидан сўнг, мюнхенликлар раҳбарияти учун Зидан асосий номзодга айланди.

Мавсум охирида Томас Тухель жамоани тарк этади. Буни мураббийнинг ўзи яна бир бор тасдиқлади.

Зинедин ва Мюнхен клуби раҳбарияти ўртасидаги музоказаралар тез орада бошланади. Зидан аллақачон таркибни, айниқса, ҳимояни кучайтиришни сўрагани айтилмоқда.

Франциялик мутахассис 2020/21 йилги мавсумдан буён ишсиз. Унинг сўнгги клуби Мадриднинг “Реал” клуби ҳисобланади.

Қайд этиб ўтиш жоиз, Зидан мураббийлик фаолияти давомида фақатгина “қаймоқранглилар”да ишлаган — 2016 йилдан 2018 йилга қадар, ҳамда 2019 йилдан 2021 йилга қадар. Франциялик мутахассис “Мадрид” клуби билан 3 марта Чемпионлар Лигасида, 2 марта Ла Лигада зафар қучган.