Миллий гвардия Humo Arena’да чиптаси борлар ҳам Маcаn концертига киритилмагани юзасидан маълумот берди

Миллий гвардия ижтимоий тармоқларда Маcаn концерт дастурига чиптаси борлар ҳам киритилмагани юзасидан тарқалган хабарларга муносабат билдирди.

Миллий гвардия ва бошқа ҳуқуқни муҳофаза қилиш органлари ходимлари томонидан оммавий тадбир ўтказиладиган жойлар, бозорлар, савдо мажмуалари ва кино-театрларда фуқаролар хавфсизлиги ва жамоат тартиби таъминланиб келинмоқда.

Хусусан, 18 апрель куни Humo Arena саройида бўлиб ўтган хонанда Маcаn’нинг концерт дастурига ҳам Миллий гвардия ходимлари шу мақсадда жалб қилинган. Концерт чипталар iTicket ходимлари томонидан махсус сканер қурилмасининг QR-коди орқали текширилиб киритилган.

Аммо баъзи бир фуқаролар қурилмани алдашга уринган ва аввал саройга кириб бўлган танишларининг чиптаси билан такроран кирмоқчи бўлган. “Ўз-ўзидан маълумки, бундай чипталарга эга бўлган фуқаролар назорат ўтиш жойидан ичкарига қўйилмаган”, — дейилади хабарда.

Миллий гвардия ва ички ишлар ходимлари томонидан ушбу фуқаролар билан тушунтириш ишлари олиб борилган ва жамоат тартиби сақланган.

Эслатиб ўтамиз, Тошкентда Jah Khalib концертига сохта чипталар сотилгани юзасидан жиноят иши қўзғатилган. Миллий гвардия Тошкент шаҳри бўйича бошқармаси берган маълумотга кўра, концерт дастури учун чиқарилган 10 мингдан ортиқ электрон чипталар сотиб олинган.

Humo Arena саройига кириш учун ташриф буюрган фуқароларнинг чипталари iTicket ходимлари томонидан махсус сканер қурилмасининг QR-коди орқали текширилиб киритилган. Ўриндиқлар тўлган бўлса-да, ташқарида концертга кириш истагида бўлган мингдан ортиқ фуқаро қолиб кетган.

Ушбу фуқароларнинг электрон чипталари кириш жойида такроран тақдим этилаётгани ҳам аниқланган ва бундай чипта эгалари назорат ўтиш жойидан ичкарига қўйилмаган. Улар чипталарни танишлари ёки бошқа жисмоний шахслардан совға сифатида ҳамда пул эвазига қўлга киритгани маълум бўлган. Айрим фуқаролар электрон чипталарни ўз манфаати йўлида такроран сотгани аниқланган.