Ғазодаги Ал-Шифо касалхонасидаги оммавий қабрлардан 30 дан ортиқ жасад топилди

Ғазо секторидаги Ал-Шифо касалхонасида топилган 2 та оммавий қабрдан 30 дан ортиқ жасадлар чиқариб олинди. Бу ҳақда Anadolu нашри хабар берди.

Манбада айтилишича, оммавий қабрлар 19 апрель куни топилган. Жасадлар орасида аёллар ва кексалар борлиги маълум қилинган.

Исроил армияси Ғазо секторидаги энг йирик касалхонага 14 кунлик ҳарбий рейд уюштиргач, ҳудудни тарк этган. Ҳудуд иншоотлари тўла вайрон қилинган.

“Жасадлар кўмилган оммавий қабрлар шифохонанинг жонлантириш бўлими ташқарисидаги ҳовлидан топилган”, — дейилади расмий хабарда.

Ҳозирда қурбонлардан 12 нафарининг шахси аниқланган. Қолганларининг маълумотлари аниқлаштирилмоқда.

Манбага кўра, қабрлар очиб кўрилганда, уларнинг қўллари боғланиб, кийимлари ечиб олингани маълум бўлган. Бу жасадлар тириклайин кўмилган бўлиши мумкинлигини англатиши мумкин.

Исроил армияси шифохонага рейд уюштирганидан бери 1000 нафарга яқин одам, жумладан, тиббиёт ходимлари ва журналистларнинг тақдири ноаниқ қолмоқда. Ҳудудда бедарак йўқолганлар қидирилмоқда.

Маълумотларга кўра, ҳозирга қадар Ғазода 34 000 дан ошиқ фаластинлик, асосан, аёллар ва болалар ҳалок бўлган. 76 800 нафарга яқин аҳоли вакиллари яраланган.

Бирлашган Миллатлар Ташкилоти маълумотларига кўра, Исроил уруши Ғазо аҳолисининг 85 фоизини озиқ-овқат, тоза сув ва дори-дармонларнинг кескин танқислиги шароитида ички кўчишга мажбур қилган. Анклав инфратузилмасининг 60 фоизи шикастланган ёки вайрон бўлган.