Қашқадарё вилоятида салкам 19 минг нафар ўқитувчи малака имтиҳонларидан ўтмоқда. Бу ҳақда “Дарё”га хабар берган вилоят Мактабгача ва мактаб таълими бошқармаси ахборот хизмати раҳбари Жавоҳир Рустамовга кўра, аттестация жараёнлари жорий ўқув йили якунига қадар давом этади.
Малака синовлари педагогларни янги методикаларга ўргатиш миллий марказининг спорт зали ҳамда фаоллар залида ўтказиши белгиланган бўлиб, бинолар замонавий ахборот коммуникация технологиялари билан жиҳозланган. 200 дона компьютер столларининг атрофи ўралиб, 8 та кузатув камералари ўрнатилган ҳамда онлайн трансляция йўлга қўйилган. Шунингдек, ўқитувчилар буюми ва кийимларини сақлаш учун жой тайёрланган. Юқори тезликдаги интернет тармоғи уланиб, бирламчи тиббий ёрдам кўрсатиш хонаси тайёр ҳолатда келтирилган, — дейди Жавоҳир Рустамов.
Масъулга кўра, педагогларга малака тоифасини бериш амалиёти такомиллаштирилиб, инсон омилисиз ўтказиладиган янги тизим жорий қилинган.
Ушбу тизим асосида малака тоифасини олиш бўйича синовлар бир йилда камида бир маротаба икки босқичда ўтказилиши белгиланди. Биринчи босқичда – педагогнинг мутахассислик фани ва касб стандарти бўйича билим даражаси баҳоланади. Бунда педагогларга мутахассислик фани бўйича 35 та ҳамда касбий стандартларига оид 5 та тест саволи берилади. Иккинчи босқичда – педагогик маҳорати баҳоланади. Бунда педагогик маҳоратни аниқлаш мақсадида 10 та савол-топшириқ берилади. Ҳар иккала босқич ҳам компьютерда реал вақт режимида (онлайн) ўтказилади. Бунинг натижасида ташқи аралашувнинг олди олиниб, инсон омили минималлаштирилади, — дейди у.
Қашқадарёда жорий ўқув йилида аттестацияда иштирок этиш учун 24 230 нафар педагог онлайн ариза топшириб, уларнинг 18 867 нафари иштирок этиши кутилмоқда.
Малака синовлари 2024 йил 15 апрель куни бошланган бўлиб, май ойининг якунига қадар давом этади. Аттестация натижалари QR-код қўйилган электрон шаклдаги педагогларнинг шахсий кабинетларига юборилади, — дейди масъул.
Аниқлаштирилишича, вилоятда фаолият юритувчи ўқитувчиларнинг 21 минг нафардан ортиғи 2022 йил аттестациядан ўтказилган бўлиб, имтиҳонлардан 5 минг нафардан ортиқ ўқитувчи ўтолмаган.
Бугунги кунда вилоятдаги мактабларда 61 минг 705 нафар педагог фаолият юритади. Уларнинг 44 фоизини тоифали ўқитувчилар ташкил этади. Шундан 4 362 нафари олий, 9 273 нафари биринчи, 13 448 нафари иккинчи малака тоифали, 21 604 нафари мутахассис лавозимига эга, 13 018 нафари тоифасиз (ўрта махсус маълумотли, тугалланмаган олий) ўқитувчилар ҳисобланади, — дейди Жавоҳир Рустамов.
Масъулнинг қўшимча қилишича, айни кунда бўлиб ўтаётган аттестация жараёнларининг шаффоф ўтишини таъминлаш мақсадида вазир ўринбосари Сардор Ражабов Қашқадарё вилоятида бўлиб, жараёнларни кузатиб бормоқда.
Изоҳ (0)