Исроил мудофаа кучлари 18 апрель куни Ғазо секторидаги Нусейрат қочқинлар лагеридан аскарларини олиб чиқиб кетди. Бу ҳақда CNN нашри хабар берди.
Манбада айтилишича, Яқин Шарқ нашрлари Исроил аскарлари чиқиб кетгандан сўнг вайрон бўлган қочқинлар лагери тасвирларини эълон қилган. Ҳудудда бир неча кун давом этган шиддатли ҳарбий амалиётлар оқибатида бино ва иншоотлар тўла вайрон бўлгани хабар қилинган.
Ғазо фуқаролик мудофааси бошқармаси ҳудуддаги талафотлар ҳақида батафсил маълумот эълон қилган. Лагер вайроналари остидан жасадлар олиб чиқилаётгани айтилган. Вайронкорлик кўлами йирик бўлгани боис жасадларни олиб чиқишда оғир техникалардан фойдаланилаётгани маълум қилинган.
Манбага кўра, лагердаги ҳарбий амалиётда 500 нафарга яқин одам ҳалок бўлган. Яраланган, ҳибсга олинган ёки бедарак йўқолганлар сони номаълум. CNN бу билан боғлиқ рақамларни тасдиқлай олмаган ва Нусейратдаги операциялар кўлами ва мақсади ҳақида маълумот олиш учун Исроил ҳарбийлари билан боғланган. Ҳарбийлар маълумот тақдим этмаган.
Нашрлар қарийб 25 минг квадрат метр йўллар, сув қудуқлари ва сувни помпалаш генераторлари вайрон бўлганини ёзган. Ёнилғи йўқлиги ва шаҳар сервис машиналарининг йўқ бўлиб кетиши оқибатида кўчалар ва лагер атрофида 20 минг тоннага яқин чиқиндилар тўпланиб, зараркунандалар билан боғлиқ муаммо юзага келган.
Изоҳ (0)