Буркина-Фасо ҳукумати 3 нафар француз дипломатини мамлакатдан чиқариб юбориш тўғрисида қарор чиқарди. Бу ҳақда Anadolu нашри хабар берди.
Манбада айтилишича, француз дипломатлари persona non gratа деб эълон қилинган. Эндиликда улар мамлакатга қайтиб кира олишмайди.
Расмий ҳукумат Франция вакилларини “қўпорувчилик фаолияти билан шуғулланиш”да айблаган. Уларга мамлакатдан чиқиб кетиш учун 48 соат берилган.
Ўтган йили Буркина-Фасо ҳарбий хунтаси икки томонлама алоқалар ёмонлашуви ортидан Франция элчиси Люк Халладни мамлакатдан ҳайдаб чиқарган эди. Жосусликда айбланган икки француз фуқароси ҳам французларга қарши кайфият кучайгани сабабли мамлакатдан чиқариб юборилган эди.
2023 йилда Франциянинг Уагадугудаги элчихонаси Франциянинг Буркина-Фасодан чиқиб кетишини талаб қилган намойишчилар томонидан икки марта ҳужумга учраган эди. Ҳукумат аҳоли талабларини инобатга олиб сиёсат юритишга ваъда берган.
Маълумот ўрнида, денгизга чиқиш имкони бўлмаган Буркина-Фасода 2022 йилда иккита давлат тўнтариши юз берган эди. Дастлаб 2022 йил январь ойида ҳарбийлар исён кўтариб, сайланган президент Роч Марк Каборни ҳукуматдан олиб ташлаган. 2022 йил сентябрида эса капитан Иброҳим Траоре бошчилигида навбатдаги ҳарбий исён содир бўлди. Ҳарбийлар подполковник Пол-Анри Сандаого Дамибани ҳукуматдан четлатиб, ҳарбий хунта эълон қилди.
Изоҳ (0)