Исроил Эрон ядро иншоотларига ҳужум қилиш билан таҳдид қилса, Теҳрон ядровий доктринасини қайта кўриб чиқади.
Бу ҳақда Ислом инқилоби қўриқчилари корпусининг ядровий мудофаа ва хавфсизлик бўлими қўмондони Аҳмад Ҳақталаб баёнот берди.
“Агар сохта сионистик режим бўлган Исроил ядровий иншоотларга зарба бериш билан таҳдид қилиб, бизга босим ўтказмоқчи бўлса, эҳтимол, Эрон Ислом Республикасининг ядровий доктринаси ва сиёсати қайта кўриб чиқилади ва мамлакат ўтмишдаги кафолатларга амал қилмайди”, — деди у ISNA агентлигига берган интервьюсида.
Аввалроқ Эрон ташқи ишлар вазири Ҳусайн Амир Абдуллоҳиян 14 апрелга ўтар кечаси Исроил ҳудудига уюштирилган дронлар ва ракеталар ҳужуми Яқин Шарқ минтақасида “кучлар мувозанатини ўзгартиргани”ни айтиб ўтганди.
Ҳужумдан сўнг Исроил томони мудофаа кучлари Эроннинг 300 га яқин снарядларининг 99 фоизини тутиб олганини қайд этган. Ракета ва дронларнинг аксарияти Эрондан, оз қисми эса Ироқ ва Ямандан учирилган.
Изоҳ (0)