Афғонистонда мавсумий ёмғирлар сабаб бўлган сув тошқинлари камида 33 кишининг ҳаётига зомин бўлди. Яна 27 киши жароҳатланган. Бу ҳақда “Толибон” ҳаракати вакиллари ахборотига таяниб, Deutsche Welle хабар берди.
Афғонистон табиий офатларни бошқариш вазирлигининг “Толибон” вакили Абдулла Жанан Саекнинг маълум қилишича, 12 апрель куни пойтахт Кобул ва мамлакатнинг бир қанча вилоятларида сув тошқинлари кузатилган. 600 дан ортиқ уй вайрон бўлган, 200 га яқин чорва моллари нобуд бўлган.
Сув тошқини 800 гектарга яқин қишлоқ хўжалиги экинлари ва 85 километрдан ортиқ йўлларга зарар етказди, — деди Саек.
Маҳаллий метеорология бошқармаси яқин кунларда Афғонистоннинг 34 вилоятининг аксариятида ёмғир ёғиши кутилаётгани ҳақида огоҳлантирган. Энг кўп ёғингарчилик Ғазни, Кобул, Қандаҳор ва Нангарҳор вилоятларига тўғри келиши кутилмоқда.
AFP нашрининг таъкидлашича, 2021 йилда Афғонистонда Толибон ҳокимиятни қўлга киритганидан сўнг, мамлакатга ташқи ёрдам ҳажми қисқарган. Бу эса табиий офатларнинг оқибатларини бартараф этишни қийинлаштирмоқда.
Изоҳ (0)