ҲАМАС Қоҳирадаги музокараларда Исроилдан гуруҳ раҳбарларини таъқиб қилишни тўхтатишни ва муҳокамалар чоғида уларни Ғазо секторидан чиқариб юбориш масаласини кўтармасликни талаб қилди. Бу ҳақда Саудия Арабистонининг Аl Arabiya ва Al-Hadath манбалари хабар берди.
ҲАМАС юқоридаги келишувдан ташқари Ғазо сектори шимолида яшаган аҳоли ҳудудга чекловсиз қайтиши шарти билан музокараларни давом эттириш учун Исроил ҳарбийларининг ҳудуддан чиқиб кетишини талаб қилган. Музокаралар давомида узоқ муддатли сулҳ тузиш таклиф этилган.
ҲАМАС 6 апрель куни Миср таклифига биноан Қоҳирага делегация юбориб, гуруҳ ўз талабларидан воз кечмаслигини маълум қилди:
Бу ўт очишни тўлиқ тўхтатиш, ишғол кучларини Ғазодан олиб чиқиб кетиш, кўчирилганларни яшаш жойларига қайтариш, одамларнинг эркин ҳаракатланишини таъминлаш, уларга ёрдам бериш ва бошпана тақдим этиш, шунингдек, гаровга олинганларни алмашиш бўйича жиддий келишувни ўзи ичига олади.
Ғазо секторидаги можарони бартараф этиш бўйича музокаралар АҚШ, Миср ва Қатар воситачилигида олиб борилмоқда. The Times of Israel нашри Исроил ҳукумати расмийсига таяниб, 7 апрель куни Тель-Авив вакиллари сулҳга эришиш ва гаровга олинганларни озод қилиш бўйича Қоҳирадаги музокараларда иштирок этишини тасдиқлади. Нашр бу Исроилнинг музокараларда иштирок этишининг “биринчи расмий тасдиғи” деб атади.
Изоҳ (0)