Жиззах ва Навоий вилоятларида ноқонуний йўллар билан АҚШга ишлаш учун юборишни ваъда қилган шахслар қўлга олинди. Бу ҳақда Бош прокуратура ҳузуридаги департамент хабар берди.
Қайд этилишича, департаментнинг Зафаробод туман бўлими томонидан ДХХ ходимлари билан ҳамкорликда тезкор тадбир ўтказилган. Тадбирда А.Қ. исмли шахс фуқаро Б.Б.нинг ишончига кириб, уни танишлари ёрдамида Америка Қўшма Штатларига ишга юбориши эвазига 20 минг долларни олган вақтида ашёвий далиллар билан ушланган.
Шу каби департаментнинг Навоий вилоят бошқармаси ва ДХХ ходимлари ҳамкорлигида Навоий шаҳрида ўтказилган тезкор тадбирда С.Т. исмли шахс фуқаро М.Ш.нинг ишончига кириб, уни Мексика давлати орқали АҚШга ишга юбориши эвазига 14 минг долларни олган вақтида ашёвий далиллар билан ушланган.
Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.
2023 йилнинг 20 декабрида АҚШга ноқонуний йўллар билан кетган 119 нафар ўзбекистонлик ватанга қайтарилган эди. Шу йилнинг февраль охирларида эса АҚШга Сан-Диего орқали 2500 дан ортиқ ўзбекистонлик ноқонуний киргани тўғрисида хабар берилганди.
Изоҳ (0)