Олий Мажлис Сенати раиси Танзила Норбоева Женева шаҳрида Халқаро меҳнат ташкилотининг Европа ва Марказий Осиё бўйича бюроси минтақавий директори Беате Андрейес билан музокара ўтказди. Бу ҳақда Сенат матбуот хизмати хабар берди.
Маълум қилинишича, Ўзбекистон ва ХМТ ўртасидаги алоқаларни кенгайтириш, жумладан, Ўзбекистонда муносиб меҳнат шароитларини тизимли равишда яратиш борасида ҳамкорликни янги босқичга олиб чиқиш масалалари кўриб чиқилган.
Суҳбат чоғида муносиб меҳнат ва ижтимоий ҳимоя тамойилларини жорий этиш, норасмий бандликка қарши курашиш, аҳолининг ижтимоий ҳимояга муҳтож қатламини асосий даромад билан таъминлаш, ўзини ўзи банд қилиш стандартларини жорий этиш каби ҳамкорлик йўналишларига эътибор қаратилган.
ХМТнинг Ўзбекистон, умуман Марказий Осиёдаги иштирокини кенгайтириш, конструктив мулоқот изчиллигини таъминлаш мақсадида Тошкент шаҳрида ХМТнинг халқаро координатори лавозими ташкил этилгани маълум қилинган. Шу билан бирга келгусида Тошкентда ХМТнинг Марказий Осиёнинг барча давлатлари учун субминтақавий ваколатхонасини ташкил этиш юзасидан фикр алмашилган.
Учрашув якунида ХМТнинг юқори малакали мутахассисларини жалб қилган ҳолда ҳамкорликдаги қўшма лойиҳаларни фаоллаштиришга келишиб олинган.
Изоҳ (0)