Сурхондарё вилояти Денов туманида археологик ёдгорликни молхона учун бузиб юборган фуқаро 23 миллиард сўм зарар етказди. Бош прокуратура ҳудудларда аниқланган шу каби ҳолатларни маълум қилди.
Қайд этилишича, прокуратура органлари томонидан Маданий мерос агентлиги билан ҳамкорликда тарихий ёдгорликларни муҳофаза қилиш ва сақлашга қаратилган тизимли назорат тадбирлари ўтказиб келинмоқда. Назорат тадбирларида Сурхондарё вилояти Денов туманидаги V-VII асрларга оид Каттатепа археологик ёдгорлиги 876 метр куб майдони фуқаро З.Ҳ. ва бошқалар томонидан молхона қуриш учун бузиб юборилиб, ёдгорликка 23,3 миллиард сўмлик зарар етказилгани аниқланди.
Шунингдек, Навоий вилоятидаги Оқтепа-1 археология ёдгорлигининг 193 м3 тупроғи 3 нафар фуқаролар томонидан ўзбошимчалик билан ковлаб олиниб, ёдгорликка 2,6 миллиард сўмлик, Бадахшонтепа археология ёдгорлигининг 164 метр куб ҳудуди экин майдонига айлантирилгани натижасида 2,3 миллиард сўмлик, Ёмонқиёттепа ёдгорлигининг 12 метр куб майдони ковлаб олингани натижасида 163 миллион сўмлик зарар етказилган.
Шу каби, Наманган вилояти Уйчи туманида ўрта асрларга оид Толмозортепа археология ёдгорлигининг 0,48 гектар қисми фуқаро А.К. томонидан техника ёрдамида текисланиб, ёдгорликка 871 миллион сўмлик зарар етказилган.
Аниқланган ҳолат юзасидан жиноят ишлари қўзғатилиб, тергов ҳаракатлари олиб борилмоқда.
Изоҳ (0)