“Олд Траффорд”да драма! “Манчестер Юнайтед” 7 та гол урилган ўйинда “Ливерпуль”ни мағлуб этди, “Челси” эса “Лестер”дан устун келди (видео)

Футбол бўйича Англия Кубоги чорак финалидан ўрин олган ўйинлар 17 март, якшанба куни бўлиб ўтди.

1/4 финалда “Манчестер Юнайтед” “Ливерпуль”га қарши баҳс олиб борди. Учрашувнинг 10-дақиқасидаёқ манкунианликлар футболчиси Скот Мактoминей ҳисобни очди. Бўлим охирида эса мерсисайдликлар иккита гол билан жавоб қайтарди. Дастлаб, 44-дақиқада Мак Аллистер ажойиб зарба билан ҳисобни тенглаштирган бўлса, ҳакам қўшиб берган дақиқаларда Муҳаммад Салоҳ дарвозани ишғол қилди.

Иккинчи бўлимда “қизиллар” нисбатан устунлик қилган бўлса-да, 87-дақиқага келиб, Антони мувозанатни тиклашга муваффақ бўлди. Шу тариқа жамоалар қўшимча бўлимларга мурожаат қилишига тўғри келди. 

105-дақиқада Эллиот узоқдан кучли зарба бериб, ҳисобни 3:2 кўринишига олиб келди. 112-дақиқада эса Рэшфорд ҳисобни тенглаштирди. 120-дақиқада эса “Манчестер Юнайтед”нинг ёш футболчиси Диалло дарвозани ишғол қилиб, жамоасига ғалаба олиб келди.

Яна бир баҳсда “Челси” “Лестер” устидан 4:2 ҳисобида зафар қучди. Лондонликлар таркибида Кукуреля, Палмер, Чуквумуэка ва Мадуэкелар гол муаллифларига айланди.

Шу тариқа Англия Кубогининг ярим финал иштирокчилари аниқланди. “Манчестер Сити” 1/2 финалда “Челси”га қарши баҳс олиб борса, “Манчестер Юнайтед” “Ковентри” билан финал йўлланмаси учун кураш олиб боради.

Учрашувлар 20 ва 21 апрель кунлари “Уэмбли”да бўлиб ўтади.

Англия Кубоги

1/4 финал

17 март, якшанба

“Манчестер Юнайтед” – “Ливерпуль” 4:3

Голлар: 1:0 – 10 Мактоминей, 1:1 – 44 Мак Аллистер, 1:2 – 45 Салоҳ, 2:2 – 87 Антони, 2:3 – 105 Эллиотт, 3:3 – 112 Рэшфорд, 4:3 – 120 Диалло.

“Манчестер Юнайтед”: Онана, Диогу Далот, Варан (Диалло, 85), Линделеф (Маунт, 105), Уан-Биссака (Магуайр, 71), Бруну Фернандеш, Мактоминей, Майну (Эриксен, 80), Гарначо, Рэшфорд, Ҳейлунд (Антони, 71).

“Ливерпуль”: Келлеҳер, Гомес (Симикас, 101), ван Дейк, Куанса, Робертсон (Бредли, 76), Эндо, Собослаи (Эллиотт, 72), Мак Аллистер, Салоҳ (Гакпо, 77), Диас (Кларк, 114), Нуньес.

Огоҳлантиришлар: Мак Аллистер (31), Бруну Фернандеш (45), Гомес (60), Келлеҳер (109), Диалло (116).

Четлатиш: Диалло (120).

“Челси” – “Лестер” 4:2

Голлар: 1:0 – 13 Кукурелйя, 2:0 – 45 Палмер, 2:1 – 51 Дисаси (автогол), 2:2 – 62 Мавидиди, 3:2 – 90 Чуквуэмека, 4:2 – 90 Мадуэке.

“Челси”: Санчес, Гюсто, Чалоба, Дисаси, Кукуреля (Чилуэлл, 90), Галлаҳер, Мудрик (Чуквуэмека, 78), Палмер, Кайседо, Стерлинг (Мадуэке, 86), Жексон.

“Лестер”: Столярчик, Вестергор, Фас, Дойл, Ндиди (Коуди, 78), Уинкс, Дюзбери-Холл, Чоудури, Мавидиди (Жастин, 75), Фатау (Акгюн, 63), Дака.

Огоҳлантиришлар: Мавидиди (67), Коуди (90).

Четлатиш: Дойл (73).