Беларусь президенти Александр Лукашенко гарчи чет элда уни диктатор дейишса-да, у учун суверен Беларусь тарихидаги ютуқлар муҳим эканини айтди. Бу ҳақда “Белта” хабар берди.
Беларусь президенти мамлакат Конституциясининг 30 йиллигига бағишланган йиғилишда бу ҳақда гапирган.
Биз ўз тарихимизни яратганмиз. Ўз қонунларимизни ҳам ёзганмиз. Шундай экан, учдан бир аср давомида ахборот, сиёсий, иқтисодий босим остида яшаяпмиз. Шу вақт давомида кордон ортида фақат дангасалар Лукашенкони диктатор ва авторитар президент деб атамади.
Майли, айтаверишсин. Муҳими, қандай натижага эга эканимизда: талон-торож қилинмаган миллий бойлик, сақлаб қолинган суверенитет, жонажон юрт хавфсизлиги ва тинчлиги, фуқаролар фаровонлигининг ошиши, одамлар учун тинчлик, осойишталик ва сукунат, — таъкидлади Беларусь президенти.
Аввалроқ Лукашенко Беларусь ва Россиянинг бир давлатга айланиш эҳтимолига муносабат билдирган эди. Жумладан, у на Россия, на Беларусь икки давлатнинг бирлашишини қўллаб-қувватламаслигини таъкидлаб, бундай қадам ҳеч қандай фойда келтирмаслиги ва вазиятни янада ёмонлаштиришини таъкидлаганди.
Эшитинг, мен “кетадиган” президентман, лекин мутлақо ишончим комилки, мендан кейин ким келмасин, бу позиция қўллаб-қувватланмайди, — деган ўшанда Лукашенко.
Эслатиб ўтамиз, 2016 йилда Россия Коммунистик партияси раиси Геннадий Зюганов Қозоғистон, Россия, Беларусь ва Украинани ўз ичига олган иттифоқ давлатини тузишни таклиф қилган эди. 2021 йил ноябрь ойида Беларусь ва Россия президентлари Иттифоқ давлатининг интеграция ҳақидаги фармонини имзолаган.
2024 йил 7 февраль куни Беларусь президенти Ўзбекистонга келган эди. У ва президент Шавкат Мирзиёев билан тор доирада учрашув бўлиб ўтган. Томонлар халқаро тузилмалар, шу жумладан, Бирлашган Миллатлар Ташкилоти, МДҲ, ШҲТ доирасидаги сиёсий мулоқот ва ўзаро қўллаб-қувватлашни давом эттиришга аҳдлашиб олган. Ўзбекистон ва Беларусь ўртасида товар айирбошлаш ҳажмини яқин йилларда 1 млрд доллардан ошириш вазифаси қўйилган. Ташриф давомида Александр Лукашенко президент билан пойтахтдаги “Ҳума Арена”га ташриф буюриб, Амирсойда чанғи учишган.
Изоҳ (0)