Довучча, шафтоли, гилос, қовун-тарвуз — Тошкентда юқори нархларда сотилаётган озиқ-овқат маҳсулотлари

“Дарё” мухбири Тошкент шаҳрида юқори нархларда сотилаётган озиқ-овқат маҳсулотлари ҳақида маълумот тайёрлади.

“Фарҳод” деҳқон бозорида 1 кило довучча (ғўра) 800 минг сўмдан сотилмоқда. Алоҳида идишларга қадоқланган 90 граммли довучча 70 минг сўмдан харидорларга таклиф этилмоқда.

Бозорда хориждан олиб келинган тарвузнинг 1 килоси 90 минг сўмдан. Бутун тарвуз сотиб олмайдиган харидорлар учун унинг ярими килолаб ҳам сотилмоқда.  

Қовуннинг нархи эса 150 минг сўмдан таклиф этилмоқда. Уни татиб кўрганларнинг айтишича, гарчи Ўзбекистонда етиштирилган қовунларнинг мазасига етмаса-да, ҳиди ва таъми бир оз ўхшаш.

“Korzinka” дўконлар тармоғидаги пештахталарда бир кило тарвузнинг нархи 99 минг 90 сўм.

Аргентинадан келтирилган гилоснинг 1 килосини 499 минг 990 сўмдан сотиб олиш мумкин. Яна шу мамлакатдан келтирилган қизил силлиқ шафтолининг килоси 249 минг 990 сўмдан таклиф этилмоқда.

Қулупнай йирик ёки майдалигига қараб 250 минг сўмгача бўлган нархда сотилмоқда.