“Янги Том Круз ва Ди Каприо”. Тимоти Шаламенинг гонорари рекорд даражада кўтарилиб кетди

Голливуд оламида янги юлдуз — Тимоти Шаламе гонорар миқдори бўйича юқори поғоналарни эгаллаб келмоқда. Бу ҳақда Peopletalk нашри хабар берди.

Variety эълон қилган Голливуднинг энг катта маош олган юлдузлар рўйхатида Америка ва Франция актёри Тимоти Шаламе ҳам ўрин олди. У бутун дунё бўйлаб миллионлаб томошабинлар қалбини забт этишда давом этмоқда. Тимоти 28 ёшида бир неча марта “Оскар” мукофотига номзод бўлди ва унинг даромади шиддат билан ошиб бормоқда.

Маълум қилинишича, Тимотининг сўнгги йирик лойиҳалари ниҳоятда муваффақиятли бўлган. “Вонка” фильми 625 миллион доллар олиб келди, “Дюна”нинг иккинчи қисми эса икки ҳафта ичида 369 миллион доллар йиғди. Бу эса ҳали бошланиши. Нашрнинг таъкидлашича, “Вонка” актёрнинг шахсан ўзи учун 8 миллион доллардан кўпроқ даромад келтирган.

Режиссёр Дени Вилневнинг “Дюна” фильмида Тимоти галактикани Харконнендан қутқариш учун фременлар билан бирлашган Пол Атрейдес ролини ўйнаган. Франшизанинг учинчи қисмидан сўнг Тимоти Шаламенинг гонорари янада ошиши кутилмоқда.