Яман шимолидаги ҳукмрон Ансор Аллоҳ (ҳусийлар) ҳаракати телекоммуникация вазири Мисфер ал-Нумайр 4 март куни кемалар Яман сувларига киришдан олдин уларнинг назоратидаги бошқармадан рухсат олишлари кераклигини айтди. Бу ҳақда Reuters хабар берди.
Ҳусий жангчилари Исроилнинг Ғазо секторидаги ҳужумига қарши фаластинликлар билан бирдамликда ҳаракат қилаётганликларини айтган. Улар ноябрь ойи ўрталаридан бери Адан кўрфазида халқаро тижорат кемаларига ҳужум қилиб келмоқда. Кундалик ҳужумлар Исроил ва ҲАМАС ўртасидаги жанглар бутун Яқин Шарқни беқарорлаштириши мумкинлиги ҳақидаги хавотирларни кучайтирган. Бунга жавобан АҚШ ва Буюк Британия ҳусий объектларига бир неча бор зарба берган.
Биз Яман Ҳарбий-денгиз кучлари билан кемаларни идентификация қилиш ҳамда рухсат олишда ёрдам беришга тайёрмиз, — дея маълум қилган ҳусийлар бошқарувидаги Аl Мasirah телеканали.
Гонконгда жойлашган HGC Global Communications’нинг 4 мартдаги хабарига кўра, камида тўртта сувости алоқа кабели — Осиё—Африка—Европа 1, Европа—Ҳиндистон Gateway, Seacоm ва ТGН-Gulf - ўтган ҳафта Қизил денгизда шикастланган. Компаниянинг ҳисобот беришича, зарар Қизил денгиз остидан ўтадиган маълумотлар трафигининг 25 фоизига таъсир кўрсатган.
Ал-Нумайра вазирлиги кабелларнинг шикастланишида АҚШ ва Буюк Британияни айблаган.
Изоҳ (0)