ДХХ Асака тумани прокурори ўринбосари ва собиқ ИИБ ходимини 15 минг доллар пора билан қўлга олди

Давлат хавфсизлик хизмати ходимлари томонидан Асака туманида мансабдор шахслар билан боғлиқ ноқонуний ҳолатлар аниқланди.

Қайд этилишича, ДХХнинг Андижон вилояти бўйича бошқармаси ходимлари томонидан тезкор тадбир ўтказилган. Тадбирда Асака тумани Ички ишлар бўлими тергов бўлинмасининг собиқ ходими Асака тумани прокурори ўринбосари орқали мазкур туман прокуратураси иш юритувида бўлган жиноят иши доирасида, қурилиш фирмаси раҳбарига нисбатан қўлланилган “қамоқ” эҳтиёт чорасини ўзгартириб, тергов ҳаракатлари давомида аниқланган зарар суммасини қайта назорат-ўлчов тадбирлари ўтказиш орқали камайтириб бериш эвазига, айбланувчининг яқинларидан 15 минг доллар олаётган вақтида ашёвий далиллар билан қўлга олинган.

Ҳолат юзасидан тўпланган материаллар асосида собиқ терговчига нисбатан Жиноят кодексининг 168-моддаси (фирибгарлик) 4-қисми “а” банди ва 28, 211-моддаси (пора бериш) 3-қисми “а” банди билан жиноят иши қўзғатилган.

Олиб борилган тергов ҳаракатлари давомида туман прокурори ўринбосари ҳам ушбу жиноят ишига айбланувчи тариқасида жалб қилинган. Ҳозирда уларга нисбатан қамоқ эҳтиёт чораси қўлланилган.

Бошқа ҳолатда эса Асака тумани ҳокимлигининг қишлоқ хўжалиги бўлими бошлиғи туман ҳокимининг қишлоқ хўжалиги масалалари бўйича ўринбосари топшириғига асосан, унга тегишли чорвачиликка ихтисослашган масъулияти чекланган жамиятга узоқ муддатга ижарага берилган ер майдонининг 50 сотих қисмини сотиш ҳамда туман кадастр бўлими орқали ушбу ер майдонининг тоифасини нотурар жойга ўзгартириб, ҳужжатларини расмийлаштириб бериш эвазига харидордан 40 минг доллар талаб қилган.

Давлат хавфсизлик хизмати ходимлари томонидан ўтказилган тезкор тадбирда, туман ҳокимлигининг қишлоқ хўжалиги бўлими бошлиғи олдиндан 15 минг доллар олган вақтида ушланган. Шунингдек, тезкор тадбир давом эттирилиб, ушбу пул маблағидан 5 минг долларни олган вақтида Кадастр агентлигининг Асака туман бўлими бошлиғи ҳам ашёвий далиллар билан қўлга олинди.

Ҳозирда Асака туман ҳокимининг қишлоқ хўжалиги масалалари бўйича ўринбосари, туман ҳокимлигининг қишлоқ хўжалиги бўлими бошлиғи ва Кадастр агентлигининг Асака туман бўлими бошлиғига нисбатан Жиноят кодексининг тегишли моддалари билан жиноят иши қўзғатилган.

Эслатиб ўтамиз, декабрь бошларида Давлат хавфсизлик хизмати ходимлари томонидан ўтказилган тезкор тадбирда Олий суднинг Жиноят ишлари бўйича судлов ҳайъати катта консултанти фуқародан 10 минг доллар олган вақтида ушланган эди.