“Толибон” ҳукумати матбуот котиби Кобулнинг қўшни давлатлар билан яхши алоқалар бўйича позициясини таъкидлаб, Афғонистоннинг бошқа давлатлар билан чегараларида хавфсизликка таҳдид йўқлигини айтди.
“Толибон” ҳукумати матбуот котиби Забиҳуллоҳ Мужоҳиднинг айтишича, Афғонистоннинг барча қўшнилари, жумладан Тожикистон билан чегарада муаммоси йўқ.
Унинг қўшимча қилишича, чегаралар хавфсизлиги Афғонистон томонидан таъминланган. Кобул ҳукумати хавфсизлик кучлари чегарадаги муаммолар ва таҳдидлардан хабардор. Афғонистондан бошқа давлатларга ҳеч қандай зарар етказилмаган.
Мужоҳиднинг сўзларига кўра, контрабанда масаласи ҳам ўтмишдагига нисбатан анча камайган ва бу муаммонинг олдини олиш учун ҳаракат қилинмоқда.
“Толибон” матбуот котиби Афғонистон барча қўшнилари билан яхши муносабатда бўлишини ва ҳеч бир қўшни билан муаммолар бўлишини истамаслигини таъкидлади.
Мужоҳид “Ягона тизимнинг ўрнатилиши билан Афғонистон ҳозир хавфсиз мамлакатга айланган, Афғонистон тупроғини бошқа давлатларга қарши ишлатмоқчи бўлган мустақил ёки хорижий гуруҳ йўқ”, — деди.
Аввалроқ Тожикистон Ташқи ишлар вазирлиги Афғонистондан келаётган таҳдидлар туфайли бу давлат Коллектив Хавфсизлик Шартномаси Ташкилотига Афғонистон билан умумий чегара хавфсизлигини мустаҳкамлаш лойиҳасини тақдим этгани ҳақида хабар берган эди.
Изоҳ (0)