Шавкат Мирзиёев Хоразм вилоятини ижтимоий-иқтисодий ривожлантириш вазифалари юзасидан йиғилишда вилоят инфратузилмасини яхшилашга алоҳида эътибор қаратилишини айтди.
Маълум қилинишича, 2024 йилда 119 та кўп қаватли уй қуриб, 3,5 мингта оиланинг яшаш шароитини яхшилаш режалаштирилган. “Янги Ўзбекистон” массивлари ташкил этилиб, 100 та кўп қаватли уй қурилиши бошланади.
Мутасаддиларга Хива шаҳри, Шовот ва Ҳазораспни урбанизация бўйича намунали ҳудудга айлантириш чораларини кўриш топширилди.
Йил якунигача Урганч ва Хива шаҳарлари ҳамда Гурлан ва Тупроққалъа туманларида оқова сув тармоғини қуриш лойиҳаси бошланади.
Электр тармоқлари, подстанция ва трансформаторларни тўлиқ янгилаш бўйича уч йиллик дастур ишлаб чиқилади. Бунда, 2024 йилда 1 минг километр тармоқ, 10 та подстанция ва 500 та трансформаторни янгилаш кўзда тутилади.
Президент келгуси икки йилда вилоятда тупроқ йўллар умуман қолмаслиги кераклигини ҳам айтди.
Яроқсиз йўлларнинг ярмини шу йилнинг ўзида таъмирдан чиқариш, Урганч—Шовот йўлининг 20 километрини сақлашга хусусий секторни жалб қилиш топширилди. Вилоятдаги 233 километр йўллар “ҳажм” усулида таъмирланиши, Тупроққалъа, Ҳазорасп, Хонқа ва Урганч туманидан ўтган 4Р-156 автомобиль йўлининг 84 километри цемент-бетон қопламага ўтказилиши белгиланди.
Изоҳ (0)