Uzbekistan’s Club ижодий жамоаси Ўзбекистонлик томошабинлар эътиборига оммабоп фильмлар ва янги лойиҳаларнинг давомини янада кенгроқ миқёсда тақдим этишга ҳозирлик кўрмоқда.
Эндиликда “Ўзбекистонлик” бренди остидаги барча фильмлар ва сериаллар лойиҳанинг медиа ҳамкорлари бўлган саккизта телеканалда намойиш этилади. Телетомошабинлар Америка мавсумини март ойидан бошлаб Мy5, UzReport TV, “Зўр TV”, “Севимли”, “Миллий TV”, “Ренессанс TV”, “Ёшлар” ва “Маҳалла” телеканалларида томоша қилишлари мумкин бўлади.
Март ойида томошабинларни, шунингдек, O‘zbekistonlik.Students махсус лойиҳасининг Америкада суратга олинган янги эпизодлари премьераси кутмоқда. Блогер Темур Алихонов Uzbekistan’s Club жамоасининг суратга олиш гуруҳи билан биргаликда АҚШнинг энг яхши университетларида бўлиб, ўзбекистонлик иқтидорли талабалар билан учрашиб, Американинг энг нуфузли таълим муассасаларига қандай ўқишга кириш ва ўқиш мумкинлиги ҳақида суҳбатлашди.
Июнь ойида Ўзбекистон халқини янги қирраларини намойиш этадиган, муваффақиятли юртошларимиз ҳақидаги қизиқарли воқеалар ҳақида ҳикоя қилувчи ва муҳокамаларга сабаб бўлиши кутилаётган Uzbekistan’s Club журналининг янги сони дунё юзини кўради. Унинг тақдимоти эса бу сафар Нью-Йоркда ташкил этиладиган навбатдаги “Ўзбекистонлик” халқаро форуми доирасида бўлиб ўтади.
Шунингдек, форум доирасида “Ўзбекистонлик” фильмининг бешинчи эпизоди премьераси бўлиб ўтади. Ушбу эпизоднинг иккала қаҳрамони ҳам ўз соҳаларида энг юқори чўққиларни забт этиш учун катта қийинчиликларни бошдан кечирган ҳамюртларимиз ҳисобланади. Йил охирида эса томошабинлар ижодий гуруҳнинг яқинда АҚШга қилган сафари чоғида тўплаган материаллари асосидаги махсус фильмнинг премьерасини томоша қилишлари мумкин.
Uzbekistan’s Club ўз ташаббусларини фаол қўллаб-қувватлаб келаётгани учун Ёшлар ишлари агентлигига, Ташқи ишлар вазирлигига, Ўзбекистон ва АҚШ элчихоналарига, шунингдек, миллатнинг янги қиёфасини яратишдаги ишончли ҳамкорлари бўлмиш — Ucell уяли алоқа операторига, Chevrolet Узбекистан автомобиль брендига ва Uzbekistan Airways миллий авиакомпаниясига ўз миннатдорчилигини изҳор қилади.
Америка мавсумининг янгилиги шундан иборатки, таниқли ўзбекистонлик муҳандис Асқарали Каримов бошловчилигида бўлган O‘zbekistonlik.Podcast деб номланган янги подкаст-шоунинг премьераси бўлиб ўтади. Шоу меҳмонлари, ўз соҳасида жаҳон эътироф этган АҚШда истиқомат қилувчи таниқли ватандошларимиз муҳим масалалар: экология, миграция, оила ва бошқа кўплаб мавзуларни муҳокама қилишади. Шоу ҳамкор телеканалларда, YouTube’да, аудио кўринишида Spotify, Apple Music, Yandex.Music’да ва бошқа стриминг хизматларида намойиш этилади. Подкастларнинг бош ҳомийси — Uzum миллий ва рақамли экотизими.
Изоҳ (0)