Агар Украина урушда мағлуб бўлса, НАТО давлатлари Россияга қарши курашишга мажбур бўлади. Бу ҳақда Пентагон раҳбари Ллойд Остин хабар берди.
Остинга кўра, Киевга қўшимча маблағ ажратиш жуда муҳим, чунки бу дунёда бир давлат ўз қўшниларининг чегараларини қайта чизиб, суверен ҳудудларини тортиб олиши мумкин бўлган вазиятнинг олдини олади.
“Биламизки, агар Путин муваффақиятга эришса, у тўхтамайди. У минтақада янада тажовузкор ҳаракатларини давом эттиради. Автократлар эса буни кузатиб, натижада бу содир бўлганидан ва биз демократик давлатни қўллаб-қувватлай олмаганимиздан руҳланади”, — деди Остин.
АҚШ мудофаа вазири агар Украина жанг майдонида мағлуб бўлса, биринчи навбатда, Болтиқбўйи мамлакатлари хавф остида қолиши мумкинлигини айтди.
“Агар Болтиқбўйи мамлакати бўлсангиз, кейингиси бўлишдан жуда хавотирдасиз. Улар Путинни, унинг нималарга қодирлигини билади. Очиғини айтсам, Украина қуласа, НАТО Россия билан урушга киришишига чиндан ишонаман”, — дея қўшимча қилди Пентагон раҳбари.
Россиянинг муносабати
Россия Ташқи ишлар вазирлиги Остиннинг НАТО ва Россия ўртасида юзага келиши мумкин бўлган можаро ҳақидаги баёнотларини “ақлдан озиш” деб атади
“Бу Россияга бевосита таҳдидми ёки Зеленский учун баҳона топишга уринишми? Иккаласи ҳам ақлдан озишдир. Аммо энди ҳамма агрессор Вашингтон эканини кўриши мумкин”, — деди ТИВ расмийси Мария Захарова.
Изоҳ (0)