Термиз шаҳридаги “Сурхондарёйўлкўкалам” унитар корхонаси солиқ ва бошқа юридик ташкилотлардан 1 млрд 278 млн сўм қарздор бўлиб қолган. Бу ҳақда ЎзА хабар бермоқда.
Маълум қилинишича, қарздор корхонага тегишли суд ҳужжатлари МИБ Термиз шаҳар бўлими иш юритувига қабул қилингач, ижро ҳаракатлари бошланиб, еттита автотранспорт воситаси хатловга олинган.
“Бу жараёнда корхонага тегишли “Лада” русумли автомашина Термиз шаҳридан топилгач, хатловга олиш пайтида ҳайдовчи давлат ижрочиларининг қонуний талабига бўйсунмасдан қўпол қонунбузилиш ҳолатини содир этиб, воқеа жойидан кетиб қолади. Олиб борилган тезкор қидирув тадбирлари чоғида автомашина топилиб, жарима майдончасига жойлаштирилди. Ҳуқуқбузарга нисбатан маъмурий баённома расмийлаштирилди”, – дейилади хабарда.
Сурхондарё вилоят бошқармаси масъул ходими Улуғбек Ҳайдаровнинг таъкидлашича, ички ишлар ва бошқа давлат органлари ҳамкорлигида ташкил этган рейд тадбирларда қидирувда бўлган 300 дан ортиқ автомашина ҳамда алимент тўлашдан бўйин товлаб, қочиб юрган 55 нафар қарздор топилган.
Жумладан, Бандихон туманида яшайдиган алиментчи қарздор ота ҳам ана шундай қидирув тадбирларидан бирида қўлга тушган. У турмуш ўртоғи билан ажрашгач, ишлаш мақсадида чет элга чиқиб, яқинларига пул жўнатиб турган бўлса-да, лекин алимент тўламай келган.
Қарздор отага нисбатан тўпланган ҳужжатлар Жиноят ишлари бўйича Бандихон туман судида кўриб чиқилиб, қарийб 9 млн сўм алимент қарздорлигини тўламагани учун унга 15 сутка маъмурий қамоқ жазоси тайинланган.
Изоҳ (0)