Кеча, 27 февраль куни Эрлинг Ҳоланд Англия Кубогидан ўрин олган “Лутон” жамоасига қарши ўйинда пента-трик қайд этди. У рақиб дарвозасига 58 дақиқа ичида 5 та гол уришга муваффақ бўлди. Ҳоланд урган 5 голнинг 4 тасига ярим ҳимоячи Кевин де Бруйне ҳаммуаллиф қилди.
Ҳоланд ва Ковачичнинг урган голларига “Лутон” ҳужумчиси Жордан Кларк дубль билан жавоб берди. Учрашув умумий 6:2 ҳисобида якунланди.
Ҳоланд бир йил ичида икки бора пента-трик қайд этмоқда. У 2023 йил, 14 март куни Чемпионлар Лигаси учрашувида “Леипсиг” дарвозасини 5 бора ишғол этган эди.
Ушбу учрашувдан сўнг ўйин қаҳрамони ўз фикрларини билдириб ўтди.
“Биз режа ишлаб чиқдик ва унга амал қилдик. Ҳамма зўр ўйнади. Де Бруйне ажойиб! У қўлидан келган ишни бошқалардан кўра яхшироқ қилади. У билан ўйнаш менга завқ беради. Биз бир-биримиздан нима хоҳлаётганимизни яхши биламиз. Кевин ақлли ўйинчи.
Мен ўзимнинг формамга қайтиб оляпман. Ўзимни яхши ҳис қилмоқдаман. Бу — ажойиб туйғу. Биз барчага хавф туғдиришга тайёрмиз”, — дейди ҳужумчи.
Ушбу учрашувдан кейин жамоа бош мураббийи Пеп Гвардиола ҳам Ҳоланд ва Кевин де Бруйненинг ўйини борасида тўхталиб ўтди.
“Нима ҳам дейиш мумкин. Бу жуда яхши. Ҳоланд “ёндирмоқда”. Унинг Кевин де Бруйне билан боғлами идеал кўриниш олди. Ажойиб ўйин бўлди ва биз чорак финалдамиз.
Кевинга Эрлингдек, Эрлингга эса Кевиндек футболчи зарур. Аммо бошқа ўйинчиларсиз бундай ўйин кўрсата олмас эдик, уларни ҳам эътироф этиш зарур”, — дейди “Манчестер Сити” мураббийи.
“Шаҳарликлар” кейинги учрашувни 3 март санасида “Манчестер Юнайтед”га қарши ўтказади.
Изоҳ (0)