Тошкент вилояти экология бошқармаси Зангиота тумани бўлими давлат инспекторлари томонидан назорат тадбири ўтказилди.
Қайд этилишича, рейд давомида “Мевазор” МФЙда яшовчи фуқароларнинг мурожаатига асосан иссиқхоналар фаолияти ўрганилган. Текширув давомида фуқаролар Н.А ва У.К. иссиқхонани иситишда автомобиль шиналари ёққани аниқланган.
Ҳолат юзасидан ҳуқуқбузарларга нисбатан Маъмурий жавобгарлик тўғрисидаги кодекснинг 88-моддаси (атмосфера ҳавосини муҳофаза қилиш талабларига риоя қилмаслик) 1-қисми билан маъмурий баённома расмийлаштирилган. Фуқаролар келгусида бундай ҳолатларни содир этмаслиги тўғрисида огоҳлантирилиб, тушунтириш ишлари олиб борилган.
Аввалроқ 21 февраль куни Тошкент шаҳри дунёнинг ҳаво сифати энг ифлос шаҳарлари рейтингида 1-ўринга чиққани хабар қилинганди. Бундай ҳавода шаҳар аҳолисига кўчада ниқоб тақиб юриш, деразаларни очмаслик, уй ичини намлантирувчи воситалар билан тозалаш тавсия этиб келинади. Ўз навбатида Тошкент вилояти ҳокимлиги ижтимоий тармоқларда кўмир сифатининг ҳаво ифлосланишига салбий таъсири кўрсатилган видеолавҳаларга муносабат билдирганди.
Изоҳ (0)