Олий Мажлис Қонунчилик палатасининг Фан, таълим, маданият ва спорт масалалари қўмитаси томонидан Ўзбекистон психологлар уюшмаси билан ҳамкорликда 21 февраль куни “Ўзбекистонда аҳолига психологик ёрдам кўрсатишнинг ҳуқуқий асослари” мавзусида давра суҳбати ўтказилди. Бу ҳақда палата матбуот хизмати хабар берди.
Давра суҳбатида соҳани ривожлантириш борасида олиб борилаётган ишлар кўламига қарамасдан жамиятда ижтимоий-психологик, жумладан, оилавий муаммолар, “оммавий маданият”нинг салбий таъсирларига тобелик ҳолатлари учраб турганлиги, шунингдек етарлича билим-малакага эга бўлмасдан туриб, “психолог” мақомини ноқонуний ўзлаштириб олаётган шахсларнинг фаолияти оммалашиб бораётганлиги қизғин муҳокама қилинган.
Мутахассислар томонидан ижтимоий тармоқлар орқали ўзини психолог сифатида таништираётган ва бу турдаги хизматларни тақдим этаётган шахслар авваламбор, мазкур йўналишда олий таълимга эга бўлиши ҳамда психологик ёрдам кўрсатиш ҳуқуқини берувчи тегишли ҳужжатга эга бўлишига оид талабни қонунчиликда белгилаш лозимлиги қайд этилган. Бундан ташқари, “психологик хизмат” тушунчаси ҳуқуқий-норматив ҳужжатлар билан белгилаб қўйилмагани ва амалиётчи психологлар реестри мавжуд эмаслиги улар фаолиятини назорат қилишда қийинчиликларни юзага келтирилаётгани таъкидланган. Шунингдек, айрим олий таълим муассасаларида ташкил этилган қисқа муддатли “Психологларни тайёрлаш” курслари тижоратга айланиб кетаётгани танқид остига олинган.
Тадбир иштирокчилари психолог-мутахассисларни тайёрлаш ва лицензиялаш борасидаги хорижий тажрибани таҳлил қилишган. Хусусан, Европа мамлакатларида психологик таълим даври 3 йилдан 5 йилгача бўлган муддатни ташкил этишини қайд этилган. Давра суҳбатида, шунингдек, амалиётчи-психологларнинг фаолиятини лицензиялаш масаласи ҳам муҳокама этилган.
Давра суҳбатида аҳолига малакали психологик ёрдам кўрсатишга доир фаолиятни тартибга солишга қаратилган қонунларни ишлаб чиқиш юзасидан тегишли таклиф ва тавсиялар берилган.
Изоҳ (0)