Шайх сўзи шарқ эртакларини эслатади. Замонавий шайхларнинг ҳаёти эса уларнинг туганмас бойлиги, гўзаллик, қадимий урф-одатлар ва замонавий технологияларни ўзида бирлаштиради. Ушбу мақолада сиз дунёдаги энг бой шайхлар қароргоҳлари билан яқиндан танишасиз.
Абу-Дабидаги Шайх Амир президент саройи
Бир неча йил аввал вафот этган БАА президенти Халифа ибн Зоид ал Наҳаён дунёдаги энг бой ҳукмдорлардан бири эди. Унинг шахсий бойлиги 15 миллиард доллардан ортиқ, оиласининг бойлиги эса 150 миллиард долларга баҳоланган.
Унинг саройи “Қаср ал-Ватан” деб номланиб, ундаги ҳовуз ва фавворалар Франциянинг Эвиан шаҳри яқинидаги булоқлардан келтирилган минерал сув билан тўлдирилган. Марҳум бутун дунёда нечта қароргоҳи борлигини эслай олмасди.
Масалан, унинг Мадрид яқинида ҳашаматли саройи бор, унда 15 нафар ишчи хизмат қилади. Ажабланарлиси, президентнинг ўзи ва унинг оиласи бу уйга ҳеч қачон ташриф буюрмаган. Лондоннинг ўзида шайхнинг 140 дан ортиқ кўчмас мулки бор.
Дубайдаги Шайх Муҳаммад саройи
Дубай амири Муҳаммад ибн Рашид ал-Мактум БАА Бош вазири ва вице-президенти ҳисобланади. Шайхнинг бойлиги 4 миллиард доллардан ошади. Айтишларича, унинг уйида ширинликларни устки қоғози билан ейишади, чунки бундай конфетлар ейиш мумкин бўлган қандолат олтини билан қопланган.
Дубай шайхи дунёдаги энг зотдор отларнинг эгаси, отхона учун ноёб ўт тўғридан тўғри Австралиядан келтирилади. Сарой арабча услубда қурилган ва уни фақат ташқи томондан кўришга рухсат бор. Сайёҳлар хиёбон бўйлаб асосий арккача тўхтамаслик шарти билан таксида саёҳат қилишлари мумкин.
Бруней султони саройи
Нурул Имон (Иймон нури) деб номланган сарой Бруней султони, дунёдаги энг бадавлат кишилардан бири ҳисобланган Ҳассанал Болкиаҳнинг қароргоҳи ҳисобланади. Унинг бойлиги 20 миллиард долларга баҳоланган ва қасри дунёдаги энг катта қароргоҳ ҳисобланади. У ҳатто энг катта турар жой мажмуаси сифатида Гиннеснинг рекордлар китобига киритилган. 200 минг квадрат метр уй, 1788 та хона, 257 та ҳаммом, 18 та лифт, бешта сузиш ҳавзаси, 5000 кишилик асосий зал ва 1,5 минг кишилик масжидга эга. Саройдаги гараж камида 110 та машинани сиғдира олади, отхона эса 200 отга мўлжалланган.
Изоҳ (0)