Тугмали кийимларнинг келиб чиқиши узоқ йиллик тарихга эга. Мутахассисларнинг фикрига кўра, Х аср бошларида аёллар ва эркаклар кийимларида турли хил маҳкамлагичлар кенг тарқалган эди. Бироқ, тугмаларнинг ўзига хос фарқи бўлган: аёллар кийими чап томондан, эркаклар кийими ўнг томондан маҳкамланган. Бунинг боиси нима?
Тугмалар тарихи: улар қачон пайдо бўлган?
Кийимни маҳкамлаш учун мўлжалланган илмоқларнинг ватани Германия ҳисобланади: айнан шу мамлакатда илк тугмалар ишлаб чиқарила бошланган. Аввал тугмалар суяк, ёғоч, темир, марварид, қимматбаҳо тошлар, кумуш ва олтиндан ясалган. Тугмачалар билан маҳкамланган энг қадимги кийим – бу эркаклар камзули саналади.
Дастлаб, тугмалар қимматбаҳо буюм саналган, чунки улардан нафақат кийим маҳкамлаш учун, балки безак сифатида ҳам фойдаланилган. Тугмалар инсонларнинг ижтимоий даражаси ва мавқейини ифодаловчи белги ҳисобланган. Ўша даврдан бошлаб аёллар ва эркаклар кийимлари тугмасининг турли томондан бўлиши белгиланган эди.
Нима учун эркаклар кийимининг тугмалари ўнг томонда жойлашган?
Эркаклар кийимидаги тугмалар ўнгда бўлиши ҳарбий одатларга боғлиқ. Бундай усул аскарлар тугмани бўш қўли билан осонгина кийиши ёки ечиб олишларига имкон яратган. Ўша даврнинг аксарият ҳарбийлари ўнг қўл бўлган ва қурол чап томонда олиб юрилган: тугмалар ўнгда бўлиши кийимга тегмасдан қуролни тезда шай қилишга ёрдам берган.
Аёллар кийимининг тугмалари чапда бўлишига сабаб нима?
Юқорида таъкидланганидек, қадимда тугмалар жуда қиммат бўлган, шунинг учун уларни фақат бадавлат аёллар ўзларига раво кўриши мумкин эди. Маълумки, зодагон аёлларни доимо хизматкорлар кийинтириб, ечинтириб қўйган. Тугмаларни чап томондан маҳкамлаш хизматчилар иш жараёнини тезлаштиришига имкон берган деган назария мавжуд. Шунингдек, чақалоқни кўкрак сути билан боқишда тугмаларнинг чапда бўлиши кийимни ўнг қўл билан ечишни осонлаштирган.
Изоҳ (0)