Тошкент вилояти ҳокими Зоир Мирзаев қуйи тизим раҳбарлари — шаҳар ва туманларда фаолият юритувчи ҳокимлар давлат дастурлари ва қарорларини ўқимаслигини, режасиз ишлашини айтиб, уларни танқид қилди. Бу ҳақда “Дарё”га Зоир Мирзаевнинг матбуот котиби Беҳзод Қобулов хабар берди.
Аниқлик киритилишича, ҳоким бу ҳақда ўтган душанба, 12 февраль куни ҳокимлик соатида гапирган.
Президентимиз ҳар сафар айтади, давлат дастурлари, қарорларини пастдаги ҳокимлар ўқиса, бу ноинсофларнинг фикри ўзгаради дейди. Ўқимайди, ўқимайди, ўқимайди. Ўқимаймиз-ку. Режасиз ишлаймиз-ку, битта селектор бўлса, районда ўша куни ҳамма нарса тўхтайди. Соат олтидан бошлаб, ҳаёт йўқми? Маҳалла тизими 6-7 дан туриб, мадҳия билан ишни бошлаган пайтда ҳокимият тўққизгача ухлаб ётса, бу мантиққа тўғри келадими? Маҳалла уйғонди. Майли, икки оғзи қийшиқ муҳокама қиляпти. Муҳокамасини пишириб есин. Лекин маҳалланинг бешлиги эрталаб, олтида уйғоқ дегани, маҳаллада ҳамма нарса назоратда дегани. Мадҳияни айтиб, эрталаб олтида ишхонасида бўлди дегани, маҳалла унинг уйи. Бунақа пайтда ҳокимлар ухлаб ётса, тўққизда ҳам ишга келолмаса? Селекторга 15 минут кечикиб келишни касб қилиб олган раҳбарлар бўлса. Мажлисга тайёрланмаса, таҳлил қўлимизда бўлмаса, иккита одам билан гаплашишга савиямиз етмаса, қаерга қараб кетяпмиз, ҳурматли ҳокимлар?, — деди ҳокимларни танқид қилган вилоят раҳбари.
Вилоят раҳбарининг айтишича, тадбиркор, фуқаро ва иш ўрни бераман деган инсон билан мулоқот қилиши учун ҳокимларда савия бўлиши керак.
Бунинг учун давлатимиз раҳбари айтганидек, қарорни ўқиш керак, ўқишни билиш керак, — дейди Зоир Мирзаев.
Изоҳ (0)