Тошкент вилояти ҳокими Зоир Мирзаев фуқаро мурожаатлари ижросини таъминлашда раҳбарларнинг кўзбўямачиликка йўл қўяётгани ҳақида айтиб, муаммони ечишга борган ҳокимлар шунчаки расмга тушиб, қайтиб келаётганини танқид қилди. Бу ҳақда “Дарё”га ҳокимлик ахборот хизмати раҳбари Беҳзод Қобулов хабар берди.
Зоир Мирзаевнинг айтишича, унга кунига аҳолидан 70-80 та мурожаат келиб тушмоқда.
Менга қилинаётган мурожаатлар ижроси бўйича ҳокимларга скриншот қилиб ташлаб юбораман. Лекин бажарилгани хусусида менга фақат Тўрақул Содиқович расми билан берди. Қолган бирорта ҳоким бермади. Кунига тахминан 70 та мурожаат бўлгач, бир ҳафтада 413 та мурожаат бўлибди. Барча мурожаатларни ҳокимларга, ташкилот раҳбарлари ва ўринбосарларимга юборяпман. Фуқаро тўғридан тўғри менга мурожаат қиляпти. “Сиз ҳокимга айтган экансиз, раҳмат келди”, деб ёзади. Бир ҳафтадан сўнг, “Келди, шу билан йўқ бўлиб кетди. Фақат расмга тушириб кетди. Ишим ҳал бўлмади”, дейди. Тўғри, мен расм сўрайман-да, — дейди Зоир Мирзаев бу ҳақда гапирар экан.
Вилоят раҳбари мурожаатларни қабул қилиш ва ижрога йўналтириш вазифасини матбуот котиби Беҳзод Қобуловга юклатганини айтиб, “ҳафтасига 400 нафар фуқаро мурожаат қилса, алоҳида қабул қилиб нима қиламан, шунақа тартибда ишлаганим маъқул эмасми?” дейди.
Ҳоким унга онлайн тарзда қилинаётган мурожаатлар орасида “Сизнинг қабулингиз бўлибди, лекин биз билмай қолибмиз”, деб ёзувчилар кўплигини таъкидлайди.
Шунинг учун фуқароларга вилоят ҳокими қабулига ёзилиш учун Халқ қабулхонасига мурожаат қилиши кераклигини, қайси қабулхонада мурожаатлар сони кўпайса, ўша қабулхонага онлайн уланиб, қабул ўтказиш механизмини қилишимиз керак, — дейди вилоят ҳокими.
Зоир Мирзаевнинг айтишича, президент порталига қилинган мурожаатлар билан шахсан туман ҳокими бошчилигидаги сектор раҳбарлари шуғулланиши керак.
Мен фуқаро мурожаати бўйича район ҳокимига, ташкилот раҳбарига ёзяпман. Ўша муаммо маҳалла раиси ёки ёшлар етакчиси гаплашиб, справка қилинган ҳолда ёпиладиган бўлса, демак ўша ҳудудда ҳоким жойидамас. Аслида, президент порталига ёзилган мурожаатни туман ҳокими ва сектор раҳбарларининг шахсан ўзи ҳал қилиши керак. Мен шахсан мурожаатни ўзим ёзиб берсам-у, уни маҳалла раиси ёки ёшлар етакчиси жойига бориб, маълумотнома қилиб, ёпиб келаверса, ҳокимлар буни бошқача тушуняпсилар. Фуқаро мурожаатларига юзаки қараяпсизлар, — деди ҳоким.
Изоҳ (0)