ОЧЛ 1/8 финал баҳсидан олдин “Насаф” ва “Ал-Айн” жамоалари мураббийлари иштирокида матбуот анжумани ўтказилди

Футбол бўйича Осиё Чемпионлар Лигасининг нимчорак финалида “Насаф” “Ал-Айн”га қарши баҳс олиб боради.

Қаршида бўлиб ўтадиган учрашув олдидан иккала жамоа бош мураббийлари иштирокида матбуот анжумани ўтказилди.

Иккала жамоа ҳам танаффус даврида эди. Юқори темпли ўйин бўлмайди, деб ўйлайман. Сабаби, жамоалар танаффусда эканликлари боис ушбу ўйинни узоқ кутди. Шунга қарамай, тактик ва курашларга бой баҳс гувоҳи бўламиз. Йигитлар ўйинга шай ва ижобий натижа учун бор маҳоратларини ишга солади. Ҳар бир ўйиндаги натижа жуда муҳим. Шунинг учун кейинги босқични кўзлаган ҳолда ўйнаймиз.

Эртанги рақиб 9 февралда Кубок учрашувини ўтказди. Бу баҳсни чуқур ўрганиб чиқдик ва йигитларга маълумотларни улашдик. Бундан ташқари, жамоанинг чемпионат ва ОЧЛдаги ўйинларини кўрсатиб, кучли ва кучсиз томонларини кўрсатдик. 

“Ал-Айн”ни кузатиб, шунга амин бўлдикки, бу жамоа ҳужумкор ўйнайди ва ҳужум қилишни яхши кўради.

Зафармурод Абдураҳматов кучли характерга эга футболчи. Биз уни болалигидан биламиз. У доимо ўзини кўрсатган. Ҳар бир футболчида бундай ҳолат учрайди. У вазиятдан чиқиб кета олади, ҳозирги ҳолати буни кўрсатиб турибди. Фақат эртанги учрашувда ким тушиши ҳақида аниқ ахборот беролмайман, аммо у таркибда бўлиши мумкин. Зафармурод терма жамоадан бетоб ҳолда қайтгани учун 4-5 кун машғулотларда иштирок этмади. Вазиятга ва тактикага қараб иш тутамиз.

Рўзиқул Бердиев, “Насаф” бош мураббийи

Эртага бизни яхши ўйин кутиб турибди. Олдинда ҳали жавоб учрашуви ҳам бор. Албатта, эртанги беллашув ҳам анча муҳим. Кўрамиз, майдонда нима бўларкан?

Умумий олганда ҳар икки жамоанинг вазияти бир хил. Биз ҳам маълум вақт давом этган танаффусдан кейин битта баҳс ўтказдик. Бироқ бу вақт оралиғида ҳам ўртоқлик ўйинларида майдонга тушдик.

Етакчиларни олиб келмадим? Вазият шундайки, қисқа муддат ичида бир нечта мусобақа ўйинларини ўтказишимизга тўғри келяпти. Шу сабабли, баъзи футболчиларни бу ерга олиб кела олмадик. Бироқ, бор таркибимиз билан ҳам керакли натижага эришиш мақсадимиз бор.

Эрнан Креспо, “Ал-Айн” бош мураббийи

“Насаф” ва “Ал-Айн” ўртасидаги 1/8 финал учрашуви 14 февраль куни 19:00 да старт олади.