Оммавий ахборот воситалари ва журналистика ҳақидаги фильмлар кўпчиликнинг эътиборини тортиши шубҳасиз. Болливудни эса ОAВсиз тасаввур этиш қийин. Бугун журналист ролини профессионал тарзда ижро этиб берган ҳинд актёрлари ҳақида сўзлашамиз.
Карина Капур
“Ҳақиқат учун кураш” – Амбикапур туманида порахўр амалдорларнинг адолатсизлигига қарши норозиликлар қандай қилиб муваффақиятга олиб келгани ҳақидаги сиёсий драма. Фильмда Карина Капур шахсиятида кучли мафкурага эга, тажрибали сиёсий журналист ролини ўйнади. Мазкур фильм қаҳрамонига ҳаётда инсонпарварлик ҳақидаги репортажлари билан машҳур бўлган CNN мухбири Кристиан Аманпур прототип қилиб олинган.
Навазуддин Сиддиқий
Актёрнинг ўйнаган энг севимли ролларидан бири “Бажранги оға” фильмидаги Чанд Навобдир. Фильм видеоси интернетда шов-шув бўлиб кетган покистонлик журналистнинг ҳақиқий ҳаётига асосланган эди. Унда суратга тушишдан аввал актёр асар моҳиятини тушуниш ва персонажни яхшироқ ифодалаш учун покистонлик ва ҳиндистонлик журналистларнинг кўплаб репортажларини томоша қилган. Натижада киноасар миллионлаб томошабинлар қалбини забт этган.
Анушка Шарма
Актриса “Пикей” фантастик комедиясида тележурналист Жанани Жагат ролини ижро этган. Телевидение учун маълумот излаётган пайт журналист ғайриоддий одамга дуч келади ва уни ўз телеканалига олиб чиқади. Фильм якунида ушбу ўзга сайёралик одамни уйга қайтишига ёрдам беради.
Рани Мукержи
Болливуднинг иқтидорли актрисаларидан бири Рани Мукержи “Жессикани ҳеч ким ўлдирмаган” фильмида журналист суриштирувини олиб борган мутахассис ролини ўйнаган. Фильм қаҳрамони ёрдами билан ёш аёлнинг жонига қасд қилиш иши қайта кўриб чиқилади ва ҳақиқат ғалаба қозонади.
Прити Зинта
“Мақсад” (2004) фильмида мафтункор Прити Зинта жанговар шароитларда ҳам ўз ишини бажаришдан қўрқмайдиган ақлли ва қўрқмас журналист Ромила Дутта ролини ижро этган. Фильм қаҳрамони келажакда журналистика соҳасида ишламоқчи бўлган ёшлар учун катта мотивация беради.
Наргиз Фаҳри
Режиссёр Шуджит Сиркарнинг “Мадрас кафеси” фильмида актриса британиялик ҳарбий мухбир ролини ижро этади. Журналист бош вазирга суиқасд уюштириш режасини фош этишда ҳарбийларга ёрдам беради. Фильм кўплаб кинотанқидчилар томонидан ижобий баҳоланган.
Изоҳ (0)