Таниқли рус режиссёри Леонид Гайдайнинг “Бриллиант қўл” фильмидаги эпизод роли билан танилган актриса Виктория Островская 85 ёшида вафот этди. Бу ҳақда телебошловчи Андрей Малахов ўзининг Telegram каналида хабар берди.
Виктория Григоревна Островская 1938 йилда туғилган. У Карпенко Каро номидаги Киев давлат театр санъати институтида ўқиган, бироқ комсомолдан ҳайдалгани учун диплом олиш имкониятидан маҳрум бўлган. Шундай кунларнинг бирида у автобазада диспетчер бўлиб ишлаётган эди ва тасодиф туфайли “Бриллиант қўл” фильмига рол ўйнаш таклифи келиб тушганда розилик берганди.
“Бриллиант қўл” фильмини суратга олиш жараёнида Леонид Гайдайнинг ёрдамчиси Викторияни учратиб қолади. Эпизодик рол учун унга ёрқин ташқи қиёфали аёл керак бўлган. Режиссёр Виктория Островскаяни ҳеч қандай кастингсиз фильмга қабул қилган. Кейинроқ у “Эски таниш” фильмида суратга тушган ва шу билан кино саноатида фаолиятини тўхтатган.
“Бир неча йил аввал Виктория менинг теледастуримда меҳмон бўлганди. Миш-мишларга кўра, унинг қариндошлари собиқ актрисани ночорликда бутунлай ёлғиз ташлаб қўйишган экан. Нақадар ачинарли тақдир”, деб ёзади Малахов.
Фильмда Виктория енгил табиатли аёл ролини ўйнагани сабабли томошабинлар уни бошқа киноларда бошқа образга лойиқ кўрмади. Молиявий қийинчиликлар, ёш бола билан ёлғиз қолиш, касал онани парвариш қилиш, бир неча марта касбни ўзгартириш — буларнинг барчаси актрисада депрессияни келтириб чиқарган эди.
Изоҳ (0)