Ўзбекистонда 2023 йилда нечта янги олийгоҳ иш бошлагани маълум бўлди

Ўзбекистонда 2023 йилда 7 та янги олий таълим муассасаси фаолияти йўлга қўйилиб, уларнинг сони жами 213 тага етди. Бу ҳақда АОКАда ўтказилган брифингда Олий таълим, фан ва инновациялар вазирлиги ахборот хизмати раҳбари Назокат Абдуқундузова маълум қилди.

Унга кўра, уларнинг 116 таси давлат, 67 таси нодавлат, 30 таси эса хорижий олий таълим муассасаларидир. Ҳозирда 213 та олийгоҳда 1 миллион 300 минг нафардан зиёд талаба таҳсил олиб, бу кўрсаткич орқали ёшларни олий таълим билан қамраб олиш даражаси 2022 йилги 38 фоиздан 42 фоизга ошди.

Quacquarelli Symonds фан соҳалари рейтингида 2 та олийгоҳ 4 та фан соҳалари бўйича топ-500, Quacquarelli Symonds Осиё университетлари рейтинги-2024 рўйхатида 14 та олийгоҳ топ-1 000, Quacquarelli Symonds Sustainability Rankings-2024 рейтингида 3 та олийгоҳ топ-1 000 университетлар рўйхатига киритилди.

Илмий фаолиятга оид давлат дастурлари доирасида умумий қиймати 242,3 миллиард сўм бўлган 157 та илмий лойиҳа молиялаштирилди. Илмий фаолиятга оид умумий молиялаштириш ҳажми 970,06 миллиард сўм бўлган 558 та лойиҳа амалга оширилди.