Ўзбекистон Бош консулхонаси томонидан бухорийлар диаспораси фаол хотин-қизлари билан биргаликда сумалак базми ташкил этилди. Бу ҳақда “Дунё” ахборот агентлиги хабар берди.
Маълум қилинишича, унда Саудия Арабистонида турли соҳаларда фаолият кўрсатаётган фаол ўзбек аёллари, хусусан, Подшоҳ Абдулазиз номидаги университет ва “Уммул Қуро” университети профессор-ўқитувчилари, Ўзбекистоннинг Жиддадаги Бош консулхонаси дипломатлари оила аъзолари қатнашди.
Сумалак базми иштирокчиларига Ўзбекистонда амалга оширилаётган ижтимоий-иқтисодий ислоҳотлар, таълим соҳасидаги ўзгаришлар, мамлакатнинг иқтисодий ва туристик салоҳияти ҳамда миллий байрамлар, ўзбек миллий таомлари, хусусан, сумалак пишириш жараёни ҳақида батафсил маълумот берилди.
Тадбир доирасида буюк мутафаккир, шоир ва давлат арбоби Алишер Навоий таваллудининг 583 йиллигига бағишланган “Навоийни англаш — маънавиятни англашдир!” мавзусида давра суҳбати ташкил этилди. Унда Ўзбекистонда Навоий меросини ўрганиш ва илмий тадқиқ, аллома асарларини таржима қилиш ва уларни бугунги авлодга етказиш борасида амалга оширилаётган ишлар ҳақида батафсил сўзлаб берилган.
Шу билан бирга, тадбир иштирокчилари 2023 йил ноябрь ойида Самарқандда бўлиб ўтган “Хотин-қизларни қўллаб-қувватлаш бўйича Ўзбекистон ва Ислом ҳамкорлик ташкилотига аъзо мамлакатлар тажрибаси” мавзусидаги халқаро форум якунларини юқори баҳолади.
Хусусан, бухорийлар диаспораси вакиллари Ўзбекистоннинг ижтимоий-иқтисодий ҳаётида аёлларнинг ўрни алоҳида эътиборга лойиқ эканини таъкидлаб, республикада хотин-қизларнинг ҳуқуқларини ҳимоя қилиш борасида амалга оширилаётган ишларни қайд этди.
Изоҳ (0)