“Бриллиант қўл” фильмидаги кўпчилик эътибор қилмайдиган ноодатий детал: бу режиссёр ғоясими ёки хатолик?

“Бриллиант қўл” фильми 1969 йилда Совет экранларида намойиш этилган Леонид Гайдайнинг машҳур комедиясидир. Семён Семёнович Горбунковнинг саргузаштлари томошабинларга шунчалик манзур бўлганки, кўпчилик ҳали ҳам фильм қаҳрамонларидан иқтибос келтиради.

Йиллар давомида фильм бошидан охиригача ёд бўлиб кетган бўлса-да, томошабинлар ҳар бир кадрдаги кўз илғамас жиҳатлар — номувофиқликлар, хатоларга эътибор қаратишдан чарчамайдилар.

Бир эпизодни эслайлик: Горбунков чет элдаги круиз саёҳатдан қайтиши.

Бош қаҳрамон СССРга тунда хориждан қўли бинт билан боғланган ҳолда қайтади ва эртаси куни эрталаб у аёли ва болалари билан кўчага сайрга чиқади. Балки эътибор бермагандирсиз, лекин ўша пайт атрофдагилар оилага узоқ тикилиб қарайдилар ва ҳатто суратга ҳам оладилар.

Бу кадр бўйича икки хил тахмин бор:

Биринчисига кўра, фильмни суратга олиш жараёнида атрофдагилар машҳур актёрдан кўзларини узолмай қолган, муҳаррир эса эътиборсизлик туфайли кадрларни олиб ташламаган.

Иккинчи версияга кўра эса, одамларнинг ортиқча эътибори фильмдаги хатолик эмас, балки хориждан қайтган оиланинг ноодатий ва ҳеч кимда учрамайдиган тарзда кийиниш услуби эди. Бундан ташқари, режиссёр Горбунковнинг қайтиб келганидан кейин уни таъқиб қилишлари ҳақидаги хавотир туйғусини шу тарзда ифодалаган дейишади.