Марго Робби Америка кино актёрлари гилдияси (SAG-АFТRA) аъзолари билан бўлган суҳбат чоғида ўзи ва режиссёр Грета Гервигнинг “Барби” фильми учун “Оскар” мукофоти номзодлари қаторидан жой олмаганлигига изоҳ берди.
“Бахтли эканингизни ҳис қилсангиз, хафа бўлиш учун ҳеч қандай сабаб йўқ”, — дейди актриса. Шунингдек, у “Барби” жамоаси “маданиятни ўзгартирадиган” бирор нарса қилишни хоҳлагани ва энг катта мукофот — мухлислар эътирофига сазовор бўлганини таъкидлади.
Роббининг фикрича, Гервиг энг яхши режиссёр сифатида мукофотга номзод бўлишга ҳақли эди.
“У қилган иш ҳаётда ҳам, фаолиятда ҳам бир марта юз беради. Ва у буни ҳақиқатан уддалади. Лекин бу йил барча фильмлар учун ақл бовар қилмас бўлди”, — дея қўшимча қилди актриса.
Аввалроқ ҳамкасблари Райан Гослинг ва Америка Феррера Марго Робби ва Грета Гервигнинг “Оскар” мукофоти номинацияларидан жой олмаганидан норозилигини билдирган эди.
Картина саккизта “Оскар” номинациясидан жой олган, жумладан, “Энг яхши фильм” номинацияси бўйича ҳам. Афсонавий қўғирчоқлар ҳақидаги фильм билан бир кунда экранга чиққан Кристофер Ноланнинг “Оппенгеймер” фильми 13 та номинацияга кириб, бу йил мутлақ рекордчига айланди.
Изоҳ (0)