Фарғонада бир туп толни кесиб ташлаган фуқаро табиатга 3 млн сўм зарар етказди
Фарғона вилояти Бувайда туманида бир туп толни кесиб ташлаган фуқаро табиатга уч млн сўм зарар етказди. Бу ҳақда вилоят Экология бошқармаси ахборот хизмати хабар берди.
Фото: Фарғона вилоят Экология бошқармаси ахборот хизмати
Унга кўра, вилоят прокуратураси ва вилоят Экология бошқармаси Бувайда туман бўлими ҳамкорлигида олиб борилаётган рейд тадбирлари жараёнида, “Жой” МФЙ ҳудудидаги автомобиль йўли четида бир туп тол дарахти шу маҳаллада яшовчи фуқаро У.Л. томонидан ўзбошимчалик билан кесиб ташлангани маълум бўлди.
Ҳолат юзасидан давлат инспекторлари томонидан Маъмурий жавобгарлик тўғрисидаги кодекснинг 79-моддаси 1-қисмига мувофиқ маъмурий баённома расмийлаштирилиб, 1 700 000 минг сўм миқдорида жарима ҳамда 3 060 000 сўм ўсимлик дунёсига зарар ҳисобланди.
Аввалроқ Олий Мажлис Қонунчилик палатаси депутатлари ва Экологик партия фракцияси аъзолари Экология вазирлигининг Тошкент вилояти бошқармаси томонидан дарахтларни кесишга берилган рухсатномаларнинг қонунийлиги юзасидан бош прокурорга депутатлик сўрови юборганди.
Фарғонада бир ҳафта давомида экологияга зарар етказган 99 киши жаримага тортилди, Тошкент шаҳрида Экопарк ходими қиш кунларида дарахтлар уйқуда бўлишига қарамасдан дарахтлар шохларига шакл бергани учун 1 020 000 зарар белгиланди ва 1 700 000 минг сўм жаримага тортилди. Шунингдек, Фарғона вилоятининг Бағдод туманида бир туп чинор дарахтини ўзбошимчалик билан кесган фуқарога табиатга етказилган зарар учун 47 миллион 775 минг сўм жарима ёзилганди.
Изоҳ (0)