Ўзбекистоннинг Истанбул шаҳридаги бош консулхонаси Туркияда сохта гувоҳномалар тайёрлаб, фирибгарлик қилаётганлардан огоҳ бўлишга чақирди.
Маълум қилинишича, сўнгги пайтларда Истанбулдаги бази бир қўштирноқ ичидаги ширкатлар томонидан Ўзбекистон фуқароларига қонунга зид равишда турли қалбаки ҳужжатларни расмийлаштириб бериш, (сохта гувоҳномалар, қалбаки маълумотномаларни тайёрлаш) АҚШ, Канада ёки Европа давлатларига бориш учун виза расмийлаштириш важи билан кўп миқдордаги пул маблағларини фирибгарлик йўли орқали ўзлаштириш ишлари кўпаймоқда.
“Энг ачинарлиси шундаки, мазкур жирканч ишни амалга ошираётган инсонларнинг аксарияти ўз ватандошларимиздир”, — деб ёзмоқда консулхона матбуот хизмати.
Бош консулхонага келиб тушган маълумотга кўра, 2024 йил бошидан бошлаб ҳозирги кунга қадар 70 дан ошиқ Ўзбекистон фуқароларининг ҳужжати сохталиги туфайли Туркиянинг тегишли идоралари томонидан уларга нисбатан тергов ишлари олиб борилмоқда.
Бундай ҳолатлар туфайли Туркияда қонуний яшаб келаётган фуқаролар ҳам бир қанча бюрократик тўсиқларга учрамоқда.
“Бош консулхона юртдошларимизни шундай ёлғон ширкатларга алданмаслик, шубҳали ёки қалбаки ҳужжатларни турк давлат идораларига асло топширмаслик, пул, шахсий ва муҳим маълумотларни бегона шахсларга бермасликларини сўрайди”, — дея огоҳликка чақирди бош консулхона.
Қайд этилишича, шу ва бошқа турдаги оғир жиноятларни содир этиб келаётган фирибгарлар ҳақидаги маълумотлар дипломатик ваколатхона томонидан Туркия ва Ўзбекистон ҳуқуқни муҳофаза қилиш идораларига берилди.
Изоҳ (0)