“Касалхона ‘креслo’сини никоҳлаб олиб, дорини ҳам ота-бобонгдан қолган фирмадан олгансан”. Зоир Мирзаев 10 нафар бош врач аризасини олди

Тошкент вилояти ҳокими Зоир Мирзаев ҳудудда фаолият юритувчи ўн нафар бош шифокорни президент топшириғини бажармасликда айблаб, “касалхона ‘креслo’сини никоҳлаб олиб, дорини ҳам ота-бободан қолган фирмадан сотиб олишга ўрганган экансан”, деган айблов билан танқид қилди. Ва уларни ишдан олишга топшириқ берди. Бу ҳақда “Дарё”га вилоят ҳокимлиги ахборот хизмати раҳбари Беҳзод Қобулов хабар берди. 

Буларнинг бирортаси маҳаллий ишлаб чиқарувчилар билан маҳаллий дорига шартнома қилмаган. Буларга импорт дори керак. Нимага йиғилишга келдингиз унда? Давлат раҳбарининг топшириғини қанча муҳокама бўлишига қарамасдан бажармасликка нима ҳақингиз бор? Ким сизларга бунақа ваколат берди? Шунчалик ҳам ноинсофмисизлар?, — дейди залда тик турган бош шифокорларга мурожаат қилар экан. 

Зоир Мирзаев тилга олинган ўн нафар бош шифокор — Ангрен, Оҳангарон шаҳар, Бекобод, Бўстонлиқ, Қибрай, Қуйи Чирчиқ, Оҳангарон, Пискент, Чиноз, Янгийўл туманларининг тиббиёт бирлашмалари бошлиғини ишдан олиш ҳақида топшириқ берди. 

Султонбеков ҳаммасини олиб қоласиз ва ҳаммасининг аризасини оласиз. Молия бошқармаси, эртага гуруҳ қилиб, булар ким билан шартнома қилган, неча сўмдан дори оляпти? Қайси импорт дорига шартнома қилган? Нега буларнинг фикри бузуқ? Баҳо берасизлар. Мен сизга прокуратура, департамент ва солиқ — ҳаммасидан одам қўшиб бераман, — дейди ҳоким масъулларга топшириқ берар экан. 

Вилоят раҳбари бош шифокорларга юзланар экан, “Офшор ва обнал фирмалардан дори олаётганларни билмайди дейсизларми?”, дейди. 

Зоир Мирзаев вилоят соғлиқни сақлаш бошқармаси бошлиғига мурожаат қилар экан, “Бугун соғлиқни сақлаш вазири билан гаплашасиз ва менга буларнинг масаласини ҳал қилиб берасиз. Бирорта одамнинг ўртасига тушиб, мана бунақа десангиз, ўзингизни ишдан олиб ташлайман, жаноб соғлиқни сақлаш бошқармаси бошлиғи, — дейди.

Ҳоким туман тиббиёт бирлашмаси бошлиқларини касалхона “кресло”сини никоҳлаб олиб, дорини ҳам ота-бобосидан қолган фирмадан сотиб олишда айблайди. 

Бир умр касалхонанинг “кресло”сини никоҳлаб олган ноинсоф иккита учтанг ўтириб олиб, дори-дармонни ҳам ўзингнинг ота-бобонгдан қолган фирмадан олишга ўрганган экансан. Халққа хиёнат қилишга нима ҳақингиз бор? Касалнинг кунидан, касалнинг ҳақидан, касал ризқини қирқиб, қаерга бормоқчисан? Қандай барака топмоқчисан? Буларнинг ҳаммаси саботаж, — дейди ҳоким. 

Тошкент вилояти ҳокими, шунингдек, республика шифохоналари филиалларининг бош шифокорлари ҳам ҳудудда жойлашгани боис, белгиланган тартибга риоя қилиши кераклигини таъкидлайди. 

Ҳурматли бош врачлар, Тошкентда турган одаминг ўртага чиқадиган бўлса, валломатинг бўлса ҳам гаплашаман. Бизга ватанпарварлар керак. Раҳбаримиз айтганларидек, тажрибаси бўлмаса ҳам, Ватанини яхши кўрса, ватанпарвар бўлса, юраги Тошкент вилояти учун ёнадиган бўлса, кеча институтни битириб келган бўлса ҳам қўямиз. Фикри тўғри, бузилиб улгурмаган ҳали, — дейди вилоят ҳокими.