Футбол бўйича Ўзбекистон терма жамоаси Осиё Кубоги 1/8 финал босқичида Таиландга қарши бўлади. Учрашув 30 январь куни бўлиб ўтади.
Ўйин олдидан Ўзбекистон терма жамоаси футболчиси Одилжон Ҳамробеков ўз фикрларини билдириб ўтди.
Турнир қизиқ палласига кирди. Ушбу босқичга чиққан барча жамоани табриклайман. Эртага бизни жуда тартибли жамоага қарши ўйин кутиб турибди. Мураббий айтганидек, биз ҳам бу ўйинга тайёрмиз.
Биз биринчи ўринда Таиландга қарши ўйин ҳақида ўйлаяпмиз. Ундан кейинги рақиб ким бўлиши ноаниқ. Кечаги ўйин (Тожикистон—БАА) буни кўрсатяптики, битта ўйинда исталган жамоа ўзи хоҳлаган натижага эриша олади. Жуда кўпчилик БААни фаворит дейишганди, лекин буни акси бўлди. Тожикистонни бу натижаси билан табриклайман.
Биз ҳам олдимизга максимал даражада яхши натижага эришишни қўйганмиз.
Жароҳатлари жиддий бўлган футболчиларимиз клубига қайтди. Ҳозир жамоа базасида бўлиб турган жароҳатланган футболчиларнинг тузалиш эҳтимоли бор. Шифокорлар улар билан ишлаяпти. Уларнинг биз билан бирга бўлиб тургани ўзига ҳам бизга ҳам руҳий жиҳатдан фойдали.
Таиланд ҳали мусобақада гол ўтказиб юбормади. Шунинг ўзи айтиб турибдики, улар тартибли жамоа. Жисмоний ҳолат бўйича бизда муаммо йўқ.
Одилжон Ҳамробеков, Ўзбекистон терма жамоаси футболчиси
Эслатиб ўтамиз, Ўзбекистон ва Таиланд ўртасидаги учрашув 30 январь куни 16:30 да старт олади.
Изоҳ (0)